ଆଞ୍ଚଳିକ ଡମ୍ବ ବିକାଶ ପରିଷଦ ଦେପୁର ପକ୍ଷରୁ ନୂଆଁଖାଇ ଭେଟଘାଟ-୨୦୨୬ ଅନୁଷ୍ଠିତ

କଳାହାଣ୍ଡି,ଭବାନିପାଟଣା ୧୨/୧୦: ରୁପେନ୍ଦ୍ର ସୁନାନୀ: କଳାହାଣ୍ଡି ଜିଲ୍ଲାରେ କଳା, ସଂସ୍କୃତି, ପରମ୍ପରା ଓ ସାମାଜିକ ଭାଇଚାରାକୁ ଆଧାର କରି ଆଞ୍ଚଳିକ ଡମ୍ବ ବିକାଶ ପରିଷଦ, ଦେପୁର ପକ୍ଷରୁ ନୂଆଁଖାଇ ଭେଟଘାଟ-୨୦୨୬ କାର୍ଯ୍ୟକ୍ରମ ରବିବାର ଦିନ ଭବାନୀପାଟଣା ବ୍ଲକ ଅନ୍ତର୍ଗତ ଇଚ୍ଛାପୁର ଆମ୍ବତୋଟାଠାରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ଡମ୍ବ ସମାଜର ବହୁ ସଂଖ୍ୟକ ମହିଳା, ପୁରୁଷ, ଯୁବକଯୁବତୀ ଓ ଶିଶୁଙ୍କ ସମାଗମ ଦେଖିବାକୁ ମିଳିଥିଲା। ସମାଜର କଳା, ସଂସ୍କୃତି ଓ ପରମ୍ପରାକୁ ଉଜ୍ଜୀବିତ ରଖିବା ସହ ସାମାଜିକ ଏକତା, ଭାଇଚାରା ଓ ଶିକ୍ଷାର ପ୍ରସାର ଉପରେ ଏହି ଭେଟଘାଟରେ ଗୁରୁତ୍ୱ ଦିଆଯାଇଥିଲା।ଏହି ପରମ୍ପରାକୁ ଆଗକୁ ବଢ଼ାଇବା ସହ ପରସ୍ପର ମଧ୍ୟରେ ସ୍ନେହ, ସମ୍ପର୍କ ଓ ସହଯୋଗର ଭାବନାକୁ ଦୃଢ଼ କରିବା ଉଦ୍ଦେଶ୍ୟରେ ନୂଆଁଖାଇ ଭେଟଘାଟର ଆୟୋଜନ କରାଯାଇଥିଲା।କାର୍ଯ୍ୟକ୍ରମରେ ଧୀମାନ ଶରତ ନାଏକ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଡମ୍ବ ବିକାଶ ପରିଷଦର ସଭାପତି ଧୀମାନ ବିଜୟ ଦୀପ, ଧୀମାନ ସୁନୀତା ମହାନନ୍ଦ, ସିଡ୍ୟୁଲ୍ଡ କାଷ୍ଟ ଫେଡେରେସନର ସଭାପତି ଦିଗାମ୍ବର ଲୁହା, ମହାସଚିବ ଧୀମାନ ଯତୀନ୍ଦ୍ର କର, ଆଇନଜୀବୀ ଧୀମାନ ଛବିଲାଲ ନିଆଲ, ଧୀମାନ ଯୁଧିଷ୍ଠିର ଭଗତ, ଧୀମାନ ଜୟପ୍ରକାଶ ଜାଲ, ଧୀମାନ ଆନ୍ଦ୍ରୀୟ ଦୀପ, ଧୀମାନ ତେଜରାଜ ବେହେରା, ଗିରିଜା ବେହେରା ଓ ଲକ୍ଷ୍ମୀଧର ତାଣ୍ଡିଙ୍କ ସମେତ ବହୁ ବୁଦ୍ଧିଜୀବୀ ମଞ୍ଚାସୀନ ହୋଇଥିଲେ। ସେମାନଙ୍କ ଉପସ୍ଥିତିରେ ସାମାଜିକ ସଂଗଠନର ଭୂମିକା, ସମାଜର ଉନ୍ନତି ଓ ଆଗାମୀ ପିଢ଼ିର ଭବିଷ୍ୟତକୁ ନେଇ ବିଭିନ୍ନ ଦିଗ ଉପରେ ଆଲୋଚନା ହୋଇଥିଲା।କାର୍ଯ୍ୟକ୍ରମର ଅନ୍ୟତମ ମୁଖ୍ୟ ଆକର୍ଷଣ ଥିଲା ଭାରତର ସମ୍ବିଧାନ ପ୍ରଣେତା ଡକ୍ଟର ଭୀମରାଓ ରାମଜୀ ଆମ୍ବେଦକରଙ୍କ ବିଚାରଧାରା ଓ ତାଙ୍କ ଆଦର୍ଶ ଉପରେ ଆଲୋଚନା ହେବା ସହ ସମାଜର ଉନ୍ନତି ପାଇଁ ଶିକ୍ଷା, ସଂଗଠନ ଓ ସାମୂହିକ ପ୍ରୟାସର ଆବଶ୍ୟକତା ରହିଛି ବୋଲି ବକ୍ତାମାନେ ନିଜ ନିଜ ବକ୍ତବ୍ୟରେ ପ୍ରକାଶ କରିଥିଲେ। ବାବାସାହେବ ଆମ୍ବେଦକରଙ୍କ ଜୀବନ, ସଂଘର୍ଷ ଓ ସମାଜ ପ୍ରତି ତାଙ୍କ ଅବଦାନକୁ ସ୍ମରଣ କରି ତାଙ୍କ ବିଚାରଧାରାକୁ ଆଗାମୀ ପିଢ଼ି ନିକଟରେ ପହଞ୍ଚାଇବାର ଆବଶ୍ୟକତା ଉପରେ ମତ ପ୍ରକାଶ ପାଇଥିଲା।ଡମ୍ବ ସମାଜର ଶିକ୍ଷାଗତ, ସାମାଜିକ ଓ ଆର୍ଥିକ ବିକାଶ ପାଇଁ ସମସ୍ତେ ଏକଜୁଟ ହୋଇ କାମ କରିବାକୁ ଆହ୍ୱାନ ଦିଆଯାଇଥିଲା। ବିଶେଷକରି ଶିଶୁ ଓ ଯୁବପିଢ଼ିଙ୍କୁ ଉଚ୍ଚଶିକ୍ଷା ପ୍ରତି ଆକୃଷ୍ଟ କରିବା, ଶିକ୍ଷାର ମହତ୍ତ୍ୱ ବୁଝାଇବା, ସାମାଜିକ ସଂଗଠନକୁ ମଜବୁତ କରିବା ଏବଂ ନିଜ ଅଧିକାର ଓ କର୍ତ୍ତବ୍ୟ ସମ୍ପର୍କରେ ସଚେତନତା ବଢ଼ାଇବା ଉପରେ ଆଲୋଚନା ହୋଇଥିଲା।ବାବାସାହେବଙ୍କ ପ୍ରସିଦ୍ଧ ଆହ୍ୱାନ ‘ଶିକ୍ଷିତ ହୁଅ, ସଂଗଠିତ ହୁଅ, ସଂଘର୍ଷ କର’କୁ ଆଧାର କରି ସମାଜର ପ୍ରତ୍ୟେକ ପରିବାର ଶିକ୍ଷାକୁ ପ୍ରାଥମିକତା ଦେବା ଉଚିତ ବୋଲି ମତ ପ୍ରକାଶ ପାଇଥିଲା। ଶିକ୍ଷା ମାଧ୍ୟମରେ ସାମାଜିକ ସଚେତନତା ବୃଦ୍ଧି, ସଂଗଠିତ ଉଦ୍ୟମ ମାଧ୍ୟମରେ ସାମୂହିକ ସମସ୍ୟାର ସମାଧାନ ଏବଂ ଗଣତାନ୍ତ୍ରିକ ଉପାୟରେ ନ୍ୟାୟସଙ୍ଗତ ଅଧିକାର ହାସଲ କରିବା ଦିଗରେ ଆଗେଇ ଆସିବାକୁ ଆହ୍ୱାନ ଦିଆଯାଇଥିଲା।ଏହି ଭେଟଘାଟ କେବଳ ସଭା ଓ ଆଲୋଚନାରେ ସୀମିତ ରହିନଥିଲା। କାର୍ଯ୍ୟକ୍ରମରେ ବିଭିନ୍ନ ଅଞ୍ଚଳରୁ ଆସିଥିବା କୁନି କୁନି ପିଲାମାନେ ବାବାସାହେବ ଡକ୍ଟର ଆମ୍ବେଦକରଙ୍କ ଗୀତର ତାଳେ ତାଳେ ନୃତ୍ୟ ପରିବେଷଣ କରିଥିଲେ। ଏହି କାର୍ଯ୍ୟକ୍ରମରେ ହଜାର ହଜାର ମହିଳା ଓ ପୁରୁଷ ଯୋଗଦେଇଥିବା ଆୟୋଜକଙ୍କ ପକ୍ଷରୁ ଜଣାଯାଇଛି। ବିଭିନ୍ନ ଅଞ୍ଚଳରୁ ଲୋକଙ୍କ ସମାଗମ ଏହି ଭେଟଘାଟକୁ ଏକ ବ୍ୟାପକ ସାମାଜିକ ମିଳନର ରୂପ ଦେଇଥିଲା। ପରସ୍ପର ମଧ୍ୟରେ ଭାବର ଆଦାନପ୍ରଦାନ, ସାମାଜିକ ସମ୍ପର୍କକୁ ସୁଦୃଢ଼ କରିବା ଏବଂ ସମାଜର ସାମୂହିକ ବିକାଶ ପାଇଁ ଏକତ୍ରିତ ହେବାର ସୁଯୋଗ ଏହି କାର୍ଯ୍ୟକ୍ରମ ଯୋଗାଇ ଦେଇଥିଲା। କାର୍ଯ୍ୟକ୍ରମକୁ ଧୀମାନ ଶୂନ୍ୟ ମଙ୍ଗରାଜ ମଞ୍ଚ ପରିଚାଳନା କରିଥିଲେ।ଏପରି ଏକ ସାମାଜିକ ମିଳନ ଆଗାମୀ ଦିନରେ ସମାଜର ନୂତନ ପିଢ଼ିଙ୍କୁ ଶିକ୍ଷା, ସଚେତନତା ଓ ସଂଗଠିତ ପ୍ରୟାସ ପ୍ରତି ଉତ୍ସାହିତ କରିବା ସହ ପରମ୍ପରା ଓ ଭାଇଚାରାକୁ ଅଧିକ ସୁଦୃଢ଼ କରିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି।