ଭପ୍ଲାଟିନମ୍ ଜୁବଲି ବର୍ଷରେ ବିଜେପୁରରେ ଭବ୍ୟ ଖଣ୍ଡାଧୂଆ ପର୍ବ ଓ କଳସ ଶୋଭାଯାତ୍ରା

ବିଜେପୁର- ବରଗଡ ଜିଲ୍ଲା ବିଜେପୁରରେ ଚଳିତ ବର୍ଷ ସାର୍ବଜନୀନ ଦୁର୍ଗାପୂଜାର ପ୍ଲାଟିନମ୍ ଜୁବଲି ପାଳନ ହେବାକୁ ଯାଉଥିବାବେଳେ ଶନିବାର ମହାଳୟା ତିଥିରେ ବିଜେପୁରରେ ବିଲ୍ୱବରଣ, କଳସ ଶୋଭାଯାତ୍ରା ଓ ପାରମ୍ପରିକ ଖଣ୍ଡାଧୂଆ ପର୍ବ ଶାରଦୀୟ ନବଦୁର୍ଗା ପୂଜା ମହାସମାରୋହରେ ପାଳିତ ହୋଇଯାଇଛି। ଶ୍ରଦ୍ଧା, ନିଷ୍ଠା ଓ ବିଶ୍ୱାସର ଏହି ପବିତ୍ର ଆୟୋଜନ କେବଳ ଏକ ଧାର୍ମିକ ବିଧି ନୁହେଁ, ବରଂ ପିଢ଼ି ପରେ ପିଢ଼ି ଧରି ବହନ କରିଆସୁଥିବା ପରମ୍ପରା, ସଂସ୍କୃତି ଓ ସାମୂହିକ ଆସ୍ଥାର ଏକ ଅନନ୍ୟ ପ୍ରତୀକ ଭାବେ ପ୍ରତିଫଳିତ ହୋଇଛି। ଏହି ଅବସରରେ ବିଜେପୁର ଜମିଦାରଙ୍କ ବାସଭବନରୁ ପାରମ୍ପରିକ ରୀତିନୀତି ଅନୁଯାୟୀ ଘଣ୍ଟଶଙ୍ଖ, ଘଣ୍ଟବାଜା, ଦୂଲ୍ ଦୁଳି ବଜାର ତାଳେ ତାଳେ ଏକ ଭବ୍ୟ ଖଣ୍ଡାଧୁଆ ଶୋଭାଯାତ୍ରା ବାହାରି ସ୍ଥାନୀୟ ଦାମୋଦର ପୋଖରୀକୁ ପହଞ୍ଚିଥିଲା। ଭକ୍ତିପୂର୍ଣ୍ଣ ପରିବେଶ ମଧ୍ୟରେ ଶତାଧିକ ଶ୍ରଦ୍ଧାଳୁଙ୍କ ଉପସ୍ଥିତି ଶୋଭାଯାତ୍ରାକୁ ଏକ ଆଧ୍ୟାତ୍ମିକ ମହୋତ୍ସବର ରୂପ ଦେଇଥିଲା। ଦାମୋଦର ପୋଖରୀରେ ପହଞ୍ଚିବା ପରେ ନିଷ୍ଠା ଓ ଶ୍ରଦ୍ଧାର ସହ ଖଣ୍ଡାଧୂଆ ସହ କୁଷ୍ମାଣ୍ଡ ବଳି ରୀତିନୀତି ସହକାରେ ପୂଜାର୍ଚ୍ଚନା କରି ପବିତ୍ର ଜଳପୂର୍ଣ୍ଣ କଳସ ଆଣି ପୂଜାମଣ୍ଡପରେ ସ୍ଥାପନ କରାଯାଇଥିଲା। ରବିବାର ପୂଜାମଣ୍ଡପ ରେ ରୀତିନୀତି ସହକାରେ ଜଗତଜନନୀ ମା ଦୁର୍ଗାଙ୍କୁ ଆବାହନ କରି ମୃଣ୍ମୟୀ ପ୍ରତିମାଙ୍କ ପୁଜାରମ୍ଭ ହୋଇଥିଲା ।ପ୍ରଥମ ଦିବସରେ ମା ଶୈଳପୁତ୍ରୀ ପୂଜା ହୋଇଥିଲା । ଅଙ୍କୁରାରୋପଣ,ଦ୍ଵାରପାଳ,ବସୁଧରା,ଉପଚାର ପୂଜା, ଚଣ୍ଡିହୋମ ପୂଜା ହୋଇଥିଲା। ବିଜେପୁର ଜମିଦାର ତଥା ବିଧାୟକ ସନତ କୁମାର ଗଡ଼ତୀୟା କର୍ତ୍ତା ଦାୟିତ୍ଵ ତୁଲାଇଥିବା ବେଳେ ରାଜପୁରୋହିତ ଚଣ୍ଡୀପାଠକ କିଶୋର ଚନ୍ଦ୍ର ପୂଜାରୀ , ପୁସ୍ତକଆଚାର୍ଯ୍ୟ ସୁରେନ୍ଦ୍ର ମହାପାତ୍ର ପୁଜକର୍ମ ସମ୍ପାଦନ କରୁଛନ୍ତି । ମଣ୍ଟୁ ମହାପାତ୍ର, ରିତିକ ପଣ୍ଡା,ନେପାଲ ଗୁରୁ ସହଯୋଗ କରୁଛନ୍ତି ।