ଜଗତପୁର ଖଣ୍ଡେଇ ହୋଟେଲରେ ଗୋମାଂସ ତରକାରୀକୁ ନେଇ ଚାପା ଉତ୍ତେଜନା | ଜବତ ହାଡ ଓ ତରକାରୀକୁ ଫୋରେନସିକ୍ ଟେଷ୍ଟ ପାଇଁ ପଠାଗଲା

ଜଗତପୁର: ଜଗତପୁର ଖଣ୍ଢେଇ ହୋଟେଲରେ ମଟନ୍ ମିଲରେ ଗୋମାଂସ ମିଶାଇ ଖାଇବାକୁ ଦିଆଯାଉଛି ବୋଲି ଅଭିଯୋଗ ହୋଇଛି। ଏହାକୁ ନେଇ ଘଟଣାସ୍ଥଳରେ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲା। ଖବର ପାଇ ଜଗତପୁର ଥାନାଅଧିକାରୀ ପ୍ରଶାନ୍ତ କୁମାର ସାସମଲ ଓ କଟକ ଜୋନ ୧ ଏସିପି ଅରୁଣ କୁମାର ସ୍ବାଇଁ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଜନତାଙ୍କୁ ବୁଝାସୁଝା କରି ସନ୍ଦେହ ସୃଷ୍ଟି କରିଥିବା ମଟନର ହାଡ଼କୁ ଜବତ କରିଛନ୍ତି । ମିଳିଥିବା ସୂଚନା ଅନୁସାରେ ସାଲେପୁର ବ୍ଲକ୍ ଅନ୍ତର୍ଗତ ପାଟପୁରର ଜନୈକ ବ୍ୟକ୍ତି ସ୍ମୃତି ରଞ୍ଜନ ମହାନ୍ତି ତାଙ୍କ ପରିବାରଙ୍କ ସହ ଉକ୍ତ ହୋଟେଲରେ ମଟନ୍ ମିଲ ଖାଇବାକୁ ମାଗିଥିଲେ। ମିଲ୍ ଖାଇବା ସମୟରେ ସେ ଏକ ବଡ଼ ହାଡ଼ ଦେଖିବାକୁ ପାଇଥିଲେ। ହାଡ଼ଟି ଏକ ଲାଲ ରଙ୍ଗର ଥିଲା। ତେଣୁ ଏହା ମଟନ୍ ବା ଛେଳି ମାଂସ ହୋଇନଥିବା ସେ ସନ୍ଦେହ କଲେ । ତେଣୁ ସେ ସଙ୍ଗେ ସଙ୍ଗେ ହୋଟେଲ କର୍ମଚାରୀଙ୍କୁ ଏନେଇ ପଚାରିବା ସହ ହାଡ଼ଟିକୁ ଦେଖାଇଥିଲେ l ତାଙ୍କ ଅଭିଯୋଗ ଶୁଣି ନିକଟ ଟେବୁଲରେ ଖାଉଥିବା ଅନ୍ୟ ୩ ଜଣ ମଧ୍ୟ ଅନୁରୂପ ଅଭିଯୋଗ କରିଥିଲେ l ଏହାପରେ କାଉଣ୍ଟରରେ ବସିଥିବା ବ୍ୟକ୍ତି ସେମାନଙ୍କୁ ପାଟି ନକରିବାକୁ କହିବା ସହ ଆଉ ଏକ ମଟନ ପ୍ଲେଟ ଦେବାକୁ କହିବାରୁ ତାଙ୍କର ସନ୍ଦେହ ବଢିଲା ଓ ଏହା ମଟନ ନୁହେଁ ବୋଲି ସେ ନିଶ୍ଚିତ ହେଲେ l ଏହାପରେ ତାଙ୍କର ଯୁକ୍ତିତର୍କ ହୋଇଥିଲା l ହିନ୍ଦୁ ହୋଇ ଗୋମାଂସ ଖାଇ ତାଙ୍କ ଧର୍ମ ଓ କାୟା ନଷ୍ଟ ହୋଇଥିବା ସେ ଥାନାରେ ଲିଖିତ ଅଭିଯୋଗ କରିଥିଲେ l ତାଙ୍କ ସହ କେନ୍ଦ୍ରାପଡ଼ା ରାଜକନିକାର ରଞ୍ଜନ ମଲ୍ଲିକ ଓ ଓଲାବରର ରାଜେଶ ମଲିକ ମଧ୍ୟ ସମାନ ଅଭିଯୋଗ କରିଥିଲେ l ଏହି ଖବର ପ୍ରଚାରିତ ହେବା କ୍ଷଣି ଶହ ଶହ ବଜରଙ୍ଗ ଦଳ କର୍ମୀ ମଧ୍ୟ ସେଠାରେ ପହଞ୍ଚି ପ୍ରତିବାଦ କରିଥିଲେ l ପୋଲିସ ପହଞ୍ଚି ବୁଝାସୁଝା କରି ପରିସ୍ଥିତି ନିୟନ୍ତ୍ରଣ କରିଥିଲା l ପୋଲିସ ହାଡକୁ ଜବତ କରି ଭେଟେନାରୀ ସର୍ଜନଙ୍କ ନିକଟକୁ ଫୋରେନସିକ ଟେଷ୍ଟ ପାଇଁ ପଠାଇଛି l ଏନେଇ ଏକ ମାମଲା ରୁଜୁ ହୋଇଛି |ଯଦି ଟେଷ୍ଟରେ ତାହା ଗୋମାଂସ ପ୍ରମାଣିତ ହୁଏ ତେବେ ଉକ୍ତ ହୋଟେଲ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସିପି ଶ୍ରୀ ସ୍ୱାଇଁ କହିଛନ୍ତି l ତେବେ ତତକ୍ଷଣାତ ହୋଟେଲ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାନଯିବା ସାଧାରଣରେ ଅସନ୍ତୋଷ ଓ ପୁଲିସ କାର୍ଯ୍ୟକଳାପ ନେଇ ସନ୍ଦେହ ସୃଷ୍ଟି କରିଛି l