ଭତ୍ତା ଯୋଜନାରେ ହିତାଧିକାରୀ ବୃଦ୍ଧି ନେଇ ପ୍ରଶ୍ନ, ୫ ଲକ୍ଷ ଆବେଦନ ପଡ଼ିଥିବା ଦାବି

ଭୁବନେଶ୍ୱର: ୨୩/୦୯: ରାଜ୍ୟରେ ବିଜେପି ସରକାର ଦାୟିତ୍ୱ ନେବା ପରେ ଭତ୍ତା ଯୋଜନାରେ ହିତାଧିକାରୀଙ୍କ ସଂଖ୍ୟା ବୃଦ୍ଧି ହୋଇନଥିବା ନେଇ ପ୍ରଶ୍ନ ଉଠିଛି। ଭତ୍ତା ପାଇଁ ପ୍ରାୟ ୫ ଲକ୍ଷ ବୃଦ୍ଧବୃଦ୍ଧା ଓ ଭିନ୍ନକ୍ଷମ ବ୍ୟକ୍ତିଙ୍କ ଆବେଦନ ଦୀର୍ଘ ଦୁଇ ବର୍ଷ ଧରି ସରକାରୀ ଦପ୍ତରରେ ପଡ଼ିରହିଥିବା ଦାବି କରାଯାଇଛି। ଏହି ସଂଖ୍ୟା ଆଗକୁ ଆହୁରି ବଢ଼ିପାରେ ବୋଲି ମଧ୍ୟ କୁହାଯାଇଛି। ଏହା ଫଳରେ ଆବଶ୍ୟକତା ଥିବା ଗରିବ ବୃଦ୍ଧବୃଦ୍ଧା ଓ ଭିନ୍ନକ୍ଷମଙ୍କ ସାମାଜିକ ନିରାପତ୍ତା ପ୍ରଭାବିତ ହେଉଥିବା ଅଭିଯୋଗ ହୋଇଛି। ସୂଚନା ଅଧିକାର ଆଇନ ମାଧ୍ୟମରେ ମିଳିଥିବା ତଥ୍ୟ ଅନୁଯାୟୀ, ରାଜ୍ୟରେ ପ୍ରାୟ ୫୭ ଲକ୍ଷ ହିତାଧିକାରୀ ବିଭିନ୍ନ ଭତ୍ତା ଯୋଜନା ଓ ମଧୁବାବୁ ପେନସନ ଯୋଜନାରେ ଅନ୍ତର୍ଭୁକ୍ତ ଅଛନ୍ତି। ସେହିପରି, ୮୦ ବର୍ଷରୁ ଅଧିକ ବୟସର ପ୍ରାୟ ୩.୮୪ ଲକ୍ଷ ବୃଦ୍ଧବୃଦ୍ଧା ମାସିକ ୩,୦୦୦ ଟଙ୍କା ଭତ୍ତା ପାଉଥିବା କୁହାଯାଇଛି। ତେବେ ଏହି ଭତ୍ତା ମଧ୍ୟ ନିୟମିତ ଭାବେ ମିଳୁନଥିବା ଅଭିଯୋଗ ରହିଛି। ଭତ୍ତା ପାଇଁ ଦୀର୍ଘ ସମୟ ଧରି ଅପେକ୍ଷା କରୁଥିବା ଯୋଗ୍ୟ ହିତାଧିକାରୀଙ୍କ ଆବେଦନର ଶୀଘ୍ର ଯାଞ୍ଚ ଓ ଭତ୍ତା ପ୍ରଦାନ ପାଇଁ ପଦକ୍ଷେପ ନେବା ଦାବି ହୋଇଛି।