ଭେଡେନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ସମସ୍ୟା ନେଇ CDMOଙ୍କୁ ୧୦ ଦଫା ଦାବିପତ୍ର : ଦାବି ପୂରଣ ନହେଲେ ହସ୍ପିଟାଲ ଘେରାଓର ଚେତାବନୀ

ଭେଡେନ: ଭେଡେନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଦୀର୍ଘଦିନ ଧରି ଲାଗି ରହିଥିବା ବିଭିନ୍ନ ସମସ୍ୟାର ସମାଧାନ ଦାବିରେ ଭେଡେନ ବ୍ଲକ କଂଗ୍ରେସ କମିଟି ପକ୍ଷରୁ ବରଗଡ଼ CDMOଙ୍କୁ ୧୦ ଦଫା ଦାବିପତ୍ର ପ୍ରଦାନ କରାଯାଇଛି। ସୋମବାର ସନ୍ଧ୍ୟା ପ୍ରାୟ ୫ଟା ସମୟରେ ଭେଡେନ ବ୍ଲକ କଂଗ୍ରେସ କମିଟି ସଭାପତି ରମେଶ ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ଏକ ପ୍ରତିନିଧି ଦଳ ବରଗଡ଼ CDMOଙ୍କୁ ଭେଟି ହସ୍ପିଟାଲର ବିଭିନ୍ନ ସମସ୍ୟା ସମ୍ପର୍କରେ ଅବଗତ କରାଇବା ସହ ଦାବିପତ୍ର ପ୍ରଦାନ କରିଥିଲେ। କଂଗ୍ରେସ କମିଟି ପକ୍ଷରୁ ଭେଡେନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ବିଶେଷଜ୍ଞ ଡାକ୍ତର ନିଯୁକ୍ତି କରିବାକୁ ଦାବି କରାଯାଇଛି। ଏଥିସହ ପୂର୍ବରୁ ଭେଡେନରେ କାର୍ଯ୍ୟରତ ଥିବା ସ୍ତ୍ରୀ ଓ ପ୍ରସୂତି ବିଶେଷଜ୍ଞ ଡାକ୍ତରଙ୍କୁ ପୁନର୍ବାର ଭେଡେନରେ ନିଯୁକ୍ତି ଦେବା ପାଇଁ ଦାବି ରହିଛି। ସେହିପରି ଭେଡେନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପାଇଁ ନିଯୁକ୍ତ ହୋଇଥିବା ରେଡିଓଗ୍ରାଫର ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟ କରୁଥିବା ନେଇ ଅଭିଯୋଗ କରାଯାଇଛି। ତେଣୁ ଭେଡେନ ହସ୍ପିଟାଲରେ ରେଡିଓଗ୍ରାଫରଙ୍କୁ ଉପଲବ୍ଧ କରାଇବା ସହ ରୋଗୀଙ୍କୁ ସ୍ଥାନୀୟ ସ୍ତରରେ ଉନ୍ନତ ସ୍ୱାସ୍ଥ୍ୟସେବା ଯୋଗାଇବାକୁ ଦାବି କରାଯାଇଛି। ଏହା ସହିତ ୫-ଟି ଯୋଜନାରେ ନିର୍ମାଣାଧୀନ ଲେବର ରୁମ୍ କାମ ଅଧାରୁ ଅଟକି ରହିଥିବା ନେଇ ମଧ୍ୟ ଅସନ୍ତୋଷ ପ୍ରକାଶ କରାଯାଇଛି। ଅଧୁରା ଥିବା ଲେବର ରୁମ୍ ନିର୍ମାଣ କାମକୁ ଶୀଘ୍ର ସମ୍ପୂର୍ଣ୍ଣ କରି ମହିଳା ଓ ପ୍ରସୂତି ରୋଗୀଙ୍କ ପାଇଁ ଉପଯୋଗୀ କରାଯିବାକୁ ଦାବି ରହିଛି। ଅନ୍ୟପଟେ ହସ୍ପିଟାଲ ପରିସରରେ ଆହାର କେନ୍ଦ୍ରକୁ ଶୀଘ୍ର କାର୍ଯ୍ୟକାରୀ କରିବା ପାଇଁ ମଧ୍ୟ କଂଗ୍ରେସ କମିଟି ଦାବି ଜଣାଇଛି। ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ସୁବିଧା ପାଇଁ ହସ୍ପିଟାଲର ମୌଳିକ ସୁବିଧାଗୁଡ଼ିକୁ ତୁରନ୍ତ ସୁଧାରିବା ଆବଶ୍ୟକ ବୋଲି କଂଗ୍ରେସ ପକ୍ଷରୁ କୁହାଯାଇଛି। ଦାବିଗୁଡ଼ିକ ଉପରେ ତୁରନ୍ତ ପଦକ୍ଷେପ ନିଆଯାଇ ସମସ୍ୟାର ସମାଧାନ କରାନଗଲେ ଆଗାମୀ ଦିନରେ ଭେଡେନ ବ୍ଲକ କଂଗ୍ରେସ କମିଟି ପକ୍ଷରୁ ଭେଡେନ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଘେରାଓ କରାଯିବ ବୋଲି ଚେତାବନୀ ଦିଆଯାଇଛି।