ଜେନାସାହିରେ ଶ୍ରୀଗଣେଶଙ୍କ ଭସାଣି ଉତ୍ସବ ଧୁମଧାମରେ ସମାପିତ

ଯାଜପୁର, ବିଂଝାରପୁର: ଯାଜପୁର ଜିଲ୍ଲା ବିଂଝାରପୁର ବ୍ଲକ ଅନ୍ତର୍ଗତ ରାହାସ ଜେନାସାହିର ଯୁବବର୍ଗ ଶ୍ରୀଗଣେଶ ପୂଜା କମିଟି ପକ୍ଷରୁ ଆୟୋଜିତ ଶ୍ରୀଗଣେଶ ପୂଜାର ଭସାଣି ଉତ୍ସବ ବହୁ ଆଡମ୍ବର ଓ ଉତ୍ସାହର ସହ ସମାପିତ ହୋଇଯାଇଛି। କମିଟିର ସଭାପତି, ସମ୍ପାଦକ ଓ ସମସ୍ତ ସଦସ୍ୟଙ୍କ ଉଦ୍ୟମ ଏବଂ ସହଯୋଗରେ ବିଘ୍ନ ବିନାଶକ ପ୍ରଭୁ ଶ୍ରୀଗଣେଶଙ୍କ ପୂଜା ଯଥାବିଧି ସମ୍ପନ୍ନ ହୋଇଥିଲା। ପୂଜାକୁ ନେଇ ଜେନାସାହି ଓ ଆଖପାଖ ଅଞ୍ଚଳରେ ଭକ୍ତିମୟ ପରିବେଶ ସହ ଉତ୍ସବର ମାହୋଲ ସୃଷ୍ଟି ହୋଇଥିଲା। ପୂଜାର ଶେଷ ପର୍ଯ୍ୟାୟରେ ଆଜି ଭସାଣି ଉତ୍ସବ ଆୟୋଜିତ ହୋଇଥିଲା। ବାଜା, ବାଣ ଓ ରୋଷଣୀରେ ସଜ୍ଜିତ ଏକ ଶୋଭାଯାତ୍ରାରେ ଶ୍ରୀଗଣେଶଙ୍କ ବିସର୍ଜନ ମୂର୍ତ୍ତିକୁ ଗ୍ରାମ ପରିକ୍ରମା କରାଯାଇ ନଦୀ ଅଭିମୁଖେ ନିଆଯାଇଥିଲା। ଶୋଭାଯାତ୍ରାରେ ଯୁବକ ଓ ଗ୍ରାମବାସୀଙ୍କ ଉତ୍ସାହ ଦେଖିବାକୁ ମିଳିଥିଲା। ବାଜାର ତାଳେ ତାଳେ ଭକ୍ତମାନଙ୍କ ଉତ୍ସାହ ଏବଂ ରୋଷଣୀର ଆଲୋକରେ ସମଗ୍ର ଅଞ୍ଚଳ ଉତ୍ସବମୁଖର ହୋଇଉଠିଥିଲା। ପରେ ଧାର୍ମିକ ରୀତିନୀତି ଅନୁସାରେ ଶ୍ରୀଗଣେଶଙ୍କ ମୂର୍ତ୍ତି ବିସର୍ଜନ କରାଯାଇଥିଲା।