ଛେଣ୍ଡିପଦାରେ ବିନା ଅନୁମତି ଡିଜେ ଅଟକ, ୪୫ ହଜାର ଜୋରିମାନା

ଛେଣ୍ଡିପଦା: ବିଶ୍ୱକର୍ମା ପୂଜା ଅବସରରେ ଆବଶ୍ୟକ ଅନୁମତି ବିନା ଡିଜେ ଚଳାଇବା ମହଙ୍ଗା ପଡ଼ିଛି। ଛେଣ୍ଡିପଦା ପୋଲିସ ନିୟମିତ ଯାଞ୍ଚ ସମୟରେ ଅନୁମତି ବିନା ଚାଲୁଥିବା ଏକ ଡିଜେ ଗାଡ଼ିକୁ ଅଟକ ରଖିଥିବା ଜଣାପଡ଼ିଛି। ଏନେଇ ଅନୁଗୋଳ ଆରଟିଓ ପକ୍ଷରୁ ୪୫,୦୦୦ ଟଙ୍କା ଜୋରିମାନା ଧାର୍ଯ୍ୟ କରାଯାଇଛି। ପୂଜା ଓ ଉତ୍ସବ ସମୟରେ ଉଚ୍ଚ ସ୍ୱରରେ ଏବଂ ବିନା ଅନୁମତିରେ ଡିଜେ ବ୍ୟବହାର ନକରିବାକୁ ପୋଲିସ ପକ୍ଷରୁ ସାଧାରଣ ଲୋକଙ୍କୁ ଅନୁରୋଧ କରାଯାଇଛି। ଅତ୍ୟଧିକ ଶବ୍ଦ ଯୋଗୁଁ ରୋଗୀ, ବୟସ୍କ ବ୍ୟକ୍ତି, ଶିଶୁ ଏବଂ ଅନ୍ୟାନ୍ୟ ସମ୍ବେଦନଶୀଳ ବ୍ୟକ୍ତିମାନେ ଅସୁବିଧାରେ ପଡ଼ିପାରନ୍ତି। ତେଣୁ ଉତ୍ସବ ପାଳନ ସମୟରେ ନିୟମକାନୁନ ପ୍ରତି ସମ୍ମାନ ରଖିବା ସହ ଦାୟିତ୍ୱପୂର୍ଣ୍ଣ ଭାବେ ପୂଜା ପାଳନ କରିବାକୁ ପୋଲିସ ପକ୍ଷରୁ ଆହ୍ୱାନ କରାଯାଇଛି। ନିଜର ଉତ୍ସବ ପାଳନ ଯେପରି ଅନ୍ୟମାନଙ୍କ ପାଇଁ ଦୁଃଖ ବା ଅସୁବିଧାର କାରଣ ନହୁଏ, ସେଥିପ୍ରତି ସମସ୍ତେ ସଚେତନ ରହିବାକୁ ଅନୁଗୋଳ ପୋଲିସ ଅନୁରୋଧ କରିଛି।