ନୟାଗଡ଼: କୁକୁଡ଼ାଝରି ବୃନ୍ଦାବନ ବିହାରୀପୁରରେ ନିଆରା କୃଷ୍ଣ ଜନ୍ମାଷ୍ଟମୀ; କୁନି କୁନି ଶ୍ରୀକୃଷ୍ଣଙ୍କ ଲୀଳାଖେଳାରେ ବିଭୋର ଗ୍ରାମବାସୀ

ସାରା ଦେଶରେ ପ୍ରଭୁ ଶ୍ରୀକୃଷ୍ଣଙ୍କ ପବିତ୍ର ଜନ୍ମୋତ୍ସବ ଆନନ୍ଦ ଉଲ୍ଲାସର ସହ ପାଳିତ ହୋଇଯାଇଛି। ଏହି ଅବସରରେ ନୟାଗଡ଼ ଜିଲ୍ଲା ରଣପୁର ବ୍ଲକ ଅନ୍ତର୍ଗତ କୁକୁଡ଼ାଝରି ବୃନ୍ଦାବନ ବିହାରୀପୁର ଗ୍ରାମରେ ଏକ ନିଆରା ଆବହୋୱା ଦେଖିବାକୁ ମିଳିଛି। ପ୍ରଭୁ ଶ୍ରୀକୃଷ୍ଣଙ୍କ ଭାବନା ଓ ସଂସ୍କୃତିକୁ ଜନମାନସରେ ଜାଗ୍ରତ କରିବା ପାଇଁ ଗ୍ରାମରେ ଏକ ଭାବପୂର୍ଣ୍ଣ ପ୍ରୟାସ କରାଯାଇଥିଲା। ​ଗ୍ରାମର କୁନି କୁନି ପିଲାମାନେ ଶ୍ରୀକୃଷ୍ଣଙ୍କ ବିଭିନ୍ନ ଲୀଳାଖେଳା ସହ ଜଡ଼ିତ ଚରିତ୍ର - ଯଥା ରାଧା-କୃଷ୍ଣ, ଗୋପ-ଗୋପାଙ୍ଗନା, ନନ୍ଦ, ଦେବକୀ ଓ ବାସୁଦେବଙ୍କ ମନୋରମ ବେଶଭୂଷାରେ ସଜ୍ଜିତ ହୋଇଥିଲେ। ଏହି କୋମଳମତି ଶିଶୁମାନେ ଧାଡ଼ି ହୋଇ କୁନି କୁନି ପାଦରେ ଗାଁ ଦାଣ୍ଡରେ ନଗର ପରିକ୍ରମା କରି ପ୍ରଭୁ କୃଷ୍ଣଙ୍କ ପ୍ରେମ ଓ ଭକ୍ତିର ବାର୍ତ୍ତା ବାଣ୍ଟିଥିଲେ। ​ଶିଶୁମାନଙ୍କର ଏହି ମନମୁଖକର ରୂପ ଦେଖି ଗ୍ରାମର ମା’ ଓ ଭଉଣୀମାନେ ହାତରେ ଫୁଲ, ଚନ୍ଦନ, ଧୂପ, ଦୀପ ଓ ନୈବେଦ୍ୟ ଧରି ସେମାନଙ୍କୁ ଶ୍ରଦ୍ଧାର ସହ ବନ୍ଦାପନା କରିଥିଲେ। ପୁରାଣର ବୃନ୍ଦାବନର ଦୃଶ୍ୟ ସେଦିନ ବୃନ୍ଦାବନ ବିହାରୀପୁର ଗ୍ରାମ ଦାଣ୍ଡରେ ଜୀବନ୍ତ ହୋଇଉଠିଥିବା ପରି ଅନୁଭୂତ ହୋଇଥିଲା। ଏହି ସାଂସ୍କୃତିକ ଓ ଭକ୍ତିମୟ କାର୍ଯ୍ୟକ୍ରମ ସମଗ୍ର ଅଞ୍ଚଳରେ ଏକ ଶ୍ରଦ୍ଧାପୂର୍ଣ୍ଣ ପରିବେଶ ସୃଷ୍ଟି କରିବା ସହ ସ୍ଥାନୀୟ ଲୋକଙ୍କ ନିକଟରେ ବେଶ୍ ଆଦୃତ ହୋଇଛି।