ବନ୍ୟା ପରିଦର୍ଶନ କଲେ ମାନ୍ୟବର ମନ୍ତ୍ରୀ

ବୈତରଣୀ ଓ ଗେଙ୍ଗୁଟି ନଦୀରେ ବନ୍ୟାଜଳ ବୃଦ୍ଧି ପାଇବା ପରେ ପ୍ରଭାବିତ ଅଞ୍ଚଳରେ ପହଞ୍ଚି ସ୍ଥିତି ସମୀକ୍ଷା କରିଛନ୍ତି ଧାମନଗର ବିଧାୟକ ତଥା ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ। ଉପସ୍ଥିତ ଥିଲେ ମାନ୍ୟବର ସାଂସଦ ଭଦ୍ରକ ଶ୍ରୀ ଅଭିମନ୍ୟୁ ସେଠୀ l ବନ୍ୟା ବିପତ୍ତି ସମୟରେ ନିଜ ନିର୍ବାଚନ ମଣ୍ଡଳୀବାସୀଙ୍କ ଦୁଃଖକଷ୍ଟକୁ ସବା ଆଗରେ ରଖି ମନ୍ତ୍ରୀ ନିଜର ସମସ୍ତ ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ସଅଳ ସାରି ସିଧାସଳଖ ଧାମନଗରରେ ପହଞ୍ଚିଥିଲେ। ମଧ୍ୟାହ୍ନରେ ଧାମନଗରରେ ପହଞ୍ଚିବା ପରେ ସେ ଆଦୌ ସମୟ ନଷ୍ଟ ନକରି ସ୍ଥିତିର ପ୍ରତ୍ୟକ୍ଷ ଅନୁଧ୍ୟାନ ପାଇଁ ଗ୍ରାଉଣ୍ଡ ଜିରୋକୁ ଓହ୍ଲାଇଥିଲେ। ଦୋବଲ, ଖଡ଼ିପଦା ଏବଂ ଷେଣ୍ଢପୁର ଅଞ୍ଚଳ ପରିଦର୍ଶନ କରି ବୈତରଣୀ ନଦୀର ଜଳସ୍ତର ଓ ବନ୍ୟାସ୍ଥିତି ନିଜେ ତଦାରଖ କରିଥିଲେ।ଏହାପରେ ଆନନ୍ଦପୁରର ମଲ୍ଲିମାହାରା ଏସକେପ୍ ପାଖକୁ ଯାଇ ସ୍ଥାନୀୟ ଲୋକଙ୍କ ସହ ଆଲୋଚନା କରିବା ସହ ସେମାନଙ୍କ ସୁରକ୍ଷା ନେଇ ଆଶ୍ୱାସନା ଦେଇଥିଲେ। ସୋହଡ଼ା ପଞ୍ଚାୟତର ଗୌରାଙ୍ଗପୁର ଏସକେପ୍, ଜୟନ୍ତରା ପୋଲ ଏବଂ କୋଚିଳା ମୁହଁ ପହଞ୍ଚି ସମ୍ଭାବ୍ୟ ବିପଦର ସମୀକ୍ଷା କରିଥିଲେ ମନ୍ତ୍ରୀ। ଲୋକଙ୍କ ଜୀବନ ଓ ସମ୍ପତ୍ତିର ସୁରକ୍ଷା ପାଇଁ ସେ ନିଜେ ବନ୍ୟାପୀଡ଼ିତ ଅଞ୍ଚଳରେ ବୁଲି ପ୍ରଶାସନିକ ତତ୍ପରତା ପ୍ରକାଶ କରିଥିଲେ। ଭଦ୍ରକ ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀ ଓ ଜଳସମ୍ପଦ ବିଭାଗର ଅଧିକାରୀଙ୍କ ସହ ରିଲିଫ୍ ଓ ଉଦ୍ଧାର କାର୍ଯ୍ୟର ଜରୁରୀ ସମୀକ୍ଷା କରିଥିଲେ।ବନ୍ୟା ପ୍ରଭାବିତ ଅଞ୍ଚଳରେ କୌଣସି ଗୋଟିଏ ବି ପରିବାର ଯେପରି ଭୋକିଲା ନରହନ୍ତି, ସେଥିପାଇଁ ତୁରନ୍ତ ରନ୍ଧାଖାଦ୍ୟ ଓ ଶୁଖିଲା ଖାଦ୍ୟ ଯୋଗାଇଦେବାକୁ କଡ଼ା ନିର୍ଦ୍ଦେଶ ଦେଇଛନ୍ତି। ବିପଦ ସମୟରେ ଜନସାଧାରଣଙ୍କ ସାଥୀରେ ଛିଡ଼ା ହେବାର ମନ୍ତ୍ରୀଙ୍କ ଏହି ନିରନ୍ତର ପ୍ରୟାସ ଏବଂ ସମ୍ବେଦନଶୀଳ ନେତୃତ୍ୱକୁ ସ୍ଥାନୀୟ ଅଞ୍ଚଳରେ ଭୂୟସୀ ପ୍ରଶଂସା କରାଯାଉଛି।