ବନ୍ୟା ପ୍ରଭାବିତ ଲୋକଙ୍କ ପାଖରେ ପହଞ୍ଚି ଦୁଃଖଦୁର୍ଦ୍ଦଶା ବୁଝିଲେ ପୂର୍ବତନ ବ୍ଲକ ଅଧ୍ୟକ୍ଷ ଅଶୋକ ନାୟକ ଓ ସମାଜସେବୀ ଡ଼. ସଞ୍ଜୟ ଦାସ

ବନ୍ୟା ବିପର୍ଯ୍ୟୟର ଏହି କଠିନ ସମୟରେ ଲୋକଙ୍କ ଦୁଃଖରେ ସାମିଲ ହେବା ଏବଂ ସେମାନଙ୍କ ପାଖରେ ଠିଆ ହେବା ହିଁ ମଣିଷର ପ୍ରଥମ କର୍ତ୍ତବ୍ୟ। ଏହି ମାନବିକତାର ପରିଚୟ ଦେଇ ଆଜି ଭଦ୍ରକ ଜିଲ୍ଲା ଧାମନଗର ବ୍ଲକ ଅନ୍ତର୍ଗତ ହସନାବାଦ ପଞ୍ଚାୟତର ବିଭିନ୍ନ ୱାର୍ଡ ସମେତ ପଙ୍ଗଟା ଗ୍ରାମରେ ପହଞ୍ଚି ବନ୍ୟା ପ୍ରଭାବିତ ପରିବାରମାନଙ୍କ ଦୁଃଖଦୁର୍ଦ୍ଦଶାକୁ ନିକଟରୁ ଅନୁଭବ କରିଥିଲେ ପୂର୍ବତନ ବ୍ଲକ ଅଧ୍ୟକ୍ଷ ଅଶୋକ ନାୟକ ଓ ବିଶିଷ୍ଟ ସମାଜସେବୀ ଡ଼. ସଞ୍ଜୟ ଦାସ। ବନ୍ୟା ପାଣିରେ ଅନେକ ପରିବାରଙ୍କ ଘରବାଡ଼ି କ୍ଷତିଗ୍ରସ୍ତ ହେବା ସହ ଦୈନନ୍ଦିନ ଜୀବନ ସମ୍ପୂର୍ଣ୍ଣ ଭାବେ ବ୍ୟାହତ ହୋଇପଡ଼ିଛି। ଖାଦ୍ୟ, ବିଶୁଦ୍ଧ ପାନୀୟ ଜଳ ଓ ଆବଶ୍ୟକ ସାମଗ୍ରୀର ଅଭାବରେ ଅନେକ ପରିବାର ଅତ୍ୟନ୍ତ କଷ୍ଟରେ ଦିନ କାଟୁଛନ୍ତି। ଏହି ପରିସ୍ଥିତିରେ ଅଶୋକ ନାୟକ ଓ ଡ଼. ସଞ୍ଜୟ ଦାସ ପ୍ରଭାବିତ ପରିବାରମାନଙ୍କ ଘରକୁ ଯାଇ ସେମାନଙ୍କ ସହ ଆଲୋଚନା କରିଥିଲେ ଏବଂ ସେମାନଙ୍କ ସୁଖଦୁଃଖ ବୁଝିବା ସହ ବିଭିନ୍ନ ସମସ୍ୟା ସମ୍ପର୍କରେ ଅବଗତ ହୋଇଥିଲେ। ପରିଦର୍ଶନ ସମୟରେ ସେମାନେ ବନ୍ୟା ପ୍ରଭାବିତ ପରିବାରମାନଙ୍କୁ ଶୁଖିଲା ଖାଦ୍ୟ ସାମଗ୍ରୀ ବଣ୍ଟନ କରିଥିଲେ। ବିପଦ ସମୟରେ ଲୋକଙ୍କ ପାଖରେ ରହିବା ଏବଂ ଯଥାସମ୍ଭବ ସହଯୋଗ କରିବା ସମାଜର ପ୍ରତ୍ୟେକ ସଚେତନ ନାଗରିକଙ୍କ ଦାୟିତ୍ୱ ବୋଲି ସେମାନେ କହିଥିଲେ। ସେମାନେ ଆହୁରି କହିଥିଲେ ଯେ ବନ୍ୟା ପ୍ରଭାବିତ ପ୍ରତ୍ୟେକ ପରିବାରଙ୍କ ନିକଟରେ ସରକାରୀ ସହାୟତା ଓ ଆବଶ୍ୟକ ରିଲିଫ୍ ସାମଗ୍ରୀ ଶୀଘ୍ର ପହଞ୍ଚିବା ଆବଶ୍ୟକ। ବନ୍ୟା ବିପର୍ଯ୍ୟୟର ଏହି ସମୟରେ ପୀଡ଼ିତ ଲୋକଙ୍କ ମୁହଁରେ ସାମାନ୍ୟ ହସ ଫୁଟାଇବା ଓ ସେମାନଙ୍କୁ ସାହସ ଦେବା ଉଦ୍ଦେଶ୍ୟରେ ଏହି ସହାୟତା କାର୍ଯ୍ୟକ୍ରମ ଜାରି ରହିବ ବୋଲି ସେମାନେ ପ୍ରକାଶ କରିଥିଲେ।