ଗାଡ଼ି ଯାଞ୍ଚ ସହ ରାସ୍ତାର ଦୁରବସ୍ଥା ପ୍ରତି ମଧ୍ୟ ଦୃଷ୍ଟି ଦେବାକୁ ଜନସାଧାରଣଙ୍କ ଦାବି

ଧରମବନ୍ଧା: ଗତ କାଲି ନୂଆପଡା ଜିଲ୍ଲା ଧରମବନ୍ଧା ଥାନା ପକ୍ଷରୁ ସମ୍ପ୍ରତି ମୋଟର ଭେହିକଲ (MV) ଚେକିଂ ଅଭିଯାନ ଜୋରଦାର ଭାବେ ଚାଲିଥିଲା । ଟ୍ରାଫିକ୍ ନିୟମ ପାଳନ, ସଡ଼କ ସୁରକ୍ଷା ସୁନିଶ୍ଚିତ କରିବା ଓ ନିୟମ ଉଲ୍ଲଂଘନକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଏହି ଯାଞ୍ଚ କରାଯାଉଥିବାରୁ ସାଧାରଣ ଲୋକ ଏହାକୁ ସ୍ୱାଗତ କରିଛନ୍ତି । ତେବେ ଏହା ସହିତ ଆଉ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ବଢ଼ିଛି । ଯେଉଁ ରାସ୍ତାରେ ଯାନବାହନ ଯାଞ୍ଚ କରାଯାଉଛି, ସେହି ରାସ୍ତାର ଅବସ୍ଥା ଅନେକ ସ୍ଥାନରେ ଅତ୍ୟନ୍ତ ଦୟନୀୟ । ବଡ଼ ବଡ଼ ଖାଲଖମା ଓ ଭଙ୍ଗା ରାସ୍ତା ଯୋଗୁଁ ପ୍ରତିଦିନ ଯାତାୟାତକାରୀମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି । ପିଚୁ ରାସ୍ତା ଏକ ପ୍ରକାର ଧ୍ୱସ୍ତ ହୋଇ ପଡିଛି । ବର୍ଷା ଦିନରେ ଏହି ସମସ୍ୟା ଆହୁରି ଗୁରୁତର ହୋଇପଡ଼ୁଛି । ସ୍ଥାନୀୟ ଲୋକଙ୍କ କହିବା ଅନୁସାରେ, କେବଳ ଗାଡ଼ି ଯାଞ୍ଚ ଓ ଜରିମାନା ଆଦାୟ କଲେ ସଡ଼କ ସୁରକ୍ଷା ସମ୍ପୂର୍ଣ୍ଣ ହେବ ନାହିଁ । ଭଲ ଓ ସୁରକ୍ଷିତ ରାସ୍ତା ମଧ୍ୟ ଦୁର୍ଘଟଣା ରୋକିବାରେ ସମାନ ଭୂମିକା ଗ୍ରହଣ କରେ । ତେଣୁ ସମ୍ପୃକ୍ତ ବିଭାଗ ତୁରନ୍ତ ରାସ୍ତାର ମରାମତି ଓ ରକ୍ଷଣାବେକ୍ଷଣ ପ୍ରତି ଦୃଷ୍ଟି ଦେବାକୁ ସାଧାରଣ ଲୋକ ଦାବି କରିଛନ୍ତି । ସଡ଼କ ସୁରକ୍ଷା କେବଳ ନିୟମ କଡ଼ାକଡ଼ିରେ ନୁହେଁ, ବରଂ ସୁରକ୍ଷିତ ଭିତ୍ତିଭୂମି ସୃଷ୍ଟିରେ ମଧ୍ୟ ନିର୍ଭର କରେ ବୋଲି ବୁଦ୍ଧିଜୀବୀ ଓ ସ୍ଥାନୀୟ ବାସିନ୍ଦାମାନେ ମତ ପ୍ରକାଶ କରିଛନ୍ତି I