ମାନବ ସେବା ଚାରିଟେବୁଲ ଟ୍ରଷ୍ଟ ପକ୍ଷରୁ ସାପ କାମୁଡ଼ା ସଚେତନତା କାର୍ଯ୍ୟକ୍ରମ

ଅନୁଗୋଳ: ଅନୁଗୋଳ ଜିଲ୍ଲାର ମାଧପୁର ଅଞ୍ଚଳ ଅନ୍ତର୍ଗତ କୁଦଗାଁ ପଞ୍ଚାୟତର ପୀତବାସପୁର ଗ୍ରାମରେ ମାନବ ସେବା ଚାରିଟେବୁଲ ଟ୍ରଷ୍ଟ ପକ୍ଷରୁ ଚିନ୍ମୟୀ ଦାସଙ୍କ ନେତୃତ୍ୱରେ ସାପ କାମୁଡ଼ା ସଚେତନତା କାର୍ଯ୍ୟକ୍ରମ ସଫଳତାର ସହ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଡା. ଅତନୁ ପଟ୍ଟନାୟକ ଯୋଗଦେଇ ସାପ କାମୁଡ଼ା ପରେ ତୁରନ୍ତ ହସ୍ପିଟାଲକୁ ଯାଇ ବୈଜ୍ଞାନିକ ଚିକିତ୍ସା ଗ୍ରହଣ କରିବା, ଆଣ୍ଟି ସ୍ନେକ୍ ଭେନମ୍ (ASV)ର ଗୁରୁତ୍ୱ ଏବଂ ଅନ୍ଧବିଶ୍ୱାସରୁ ଦୂରେଇ ରହିବା ପାଇଁ ଜନସାଧାରଣଙ୍କୁ ସଚେତନ କରିଥିଲେ। ସମ୍ମାନିତ ଅତିଥି ଭାବେ ଫରେଷ୍ଟର ଦୀପକ ପ୍ରଧାନ, ପ୍ରବୀଣ ସାହୁ, ଲିଙ୍କି ସାହୁ, ମଧୁସୂଦନ ପ୍ରଧାନ ଓ ସଂଗ୍ରାମ କର୍ଣ୍ଣ ଉପସ୍ଥିତ ରହି ସାପ ପରିବେଶର ଏକ ଅବିଚ୍ଛେଦ୍ୟ ଅଂଶ ବୋଲି କହିଥିଲେ। ସେମାନେ ସାପକୁ ଅନାବଶ୍ୟକ ଭାବେ ନ ମାରି ସୁରକ୍ଷିତ ଉଦ୍ଧାର ଓ ସଂରକ୍ଷଣ ପ୍ରତି ସମସ୍ତଙ୍କୁ ସଚେତନ କରିଥିଲେ। ଏହି ଅବସରରେ ସାପ କାମୁଡ଼ାରୁ ବଞ୍ଚିବାର ଉପାୟ, କାମୁଡ଼ା ପରେ କ'ଣ କରିବା ଏବଂ କ'ଣ ନ କରିବା ସମ୍ପର୍କରେ ପୀତବାସପୁର ଗ୍ରାମବାସୀଙ୍କୁ ବିସ୍ତୃତ ଭାବେ ସଚେତନ କରାଯାଇଥିଲା। ସେହିପରି ସାପ କାମୁଡ଼ା ସଚେତନତା ଶପଥ ପାଠ କରାଯିବା ସହ ଏକ ସଚେତନତା ରାଲିର ମଧ୍ୟ ଆୟୋଜନ କରାଯାଇଥିଲା। କାର୍ଯ୍ୟକ୍ରମରେ ବହୁ ସଂଖ୍ୟକ ଗ୍ରାମବାସୀ ଯୋଗଦେଇ ସଚେତନତା ବାର୍ତ୍ତାକୁ ସମର୍ଥନ ଜଣାଇଥିଲେ।