ଅସୁରକ୍ଷିତ ଅବସ୍ଥାରେ ସୋଲାର କମ୍ପାନୀ; ବିସ୍ଫୋରକ କଞ୍ଚାମାଲ ସଂରକ୍ଷଣକୁ ନେଇ ଉଠିଲା ପ୍ରଶ୍ନ

ତାଳଚେର: ତାଳଚେର ବ୍ଲକ ଅନ୍ତର୍ଗତ ଘଣ୍ଟପଢା ଗ୍ରାମ ପଞ୍ଚାୟତ ନିକଟରେ ଅବସ୍ଥିତ ଏକ ସୋଲାର କମ୍ପାନୀରେ ଡିନାମାଇଟ୍ ପ୍ରସ୍ତୁତି ପାଇଁ ବ୍ୟବହୃତ ବିସ୍ଫୋରକ କଞ୍ଚାମାଲ ସଂରକ୍ଷିତ ରଖାଯାଉଥିବା ଅଭିଯୋଗ ହୋଇଛି। ଏହି କଞ୍ଚାମାଲ ପରେ ବିଭିନ୍ନ କୋଇଲା ଖଣିକୁ ଉତ୍ତୋଳନ କାର୍ଯ୍ୟ ପାଇଁ ପଠାଯାଉଥିବା କୁହାଯାଉଛି। ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ସଂସ୍ଥାରେ କର୍ମଚାରୀ କାର୍ଯ୍ୟରତ ଥିଲେ ମଧ୍ୟ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ନାହିଁ। ଏଭଳି ସମ୍ବେଦନଶୀଳ ସାମଗ୍ରୀ ସଂରକ୍ଷଣ ସ୍ଥଳରେ ଅଗ୍ନି ନିର୍ବାପଣ, ସୁରକ୍ଷା ମାନକ ଏବଂ ଜରୁରୀକାଳୀନ ପଦକ୍ଷେପ ପର୍ଯ୍ୟାପ୍ତ କି ନୁହେଁ, ସେନେଇ ପ୍ରଶ୍ନ ଉଠିଛି। ସ୍ଥାନୀୟ ବାସିନ୍ଦାଙ୍କ କହିବା ଅନୁସାରେ, ଯଦି କୌଣସି ଅଘଟଣା ଘଟେ, ତାହାର ଦାୟିତ୍ୱ କିଏ ନେବ? ଏହି ପ୍ରସଙ୍ଗରେ ସମ୍ପୃକ୍ତ ବିଭାଗ ତୁରନ୍ତ ଯାଞ୍ଚ କରି ସୁରକ୍ଷା ବ୍ୟବସ୍ଥାର ସମୀକ୍ଷା କରିବାକୁ ଦାବି ହେଉଛି।