ସେରୁବନ୍ଦ ପାହାଡ଼ରେ ବକ୍ସାଇଟ୍ ଖନନକୁ ବିରୋଧ, ହଜାରରୁ ଅଧିକ ଲୋକଙ୍କ ମୋଟରସାଇକେଲ୍ ରାଲି ଓ ଦାବିପତ୍ର ପ୍ରଦାନ

କୋରାପୁଟ: ପୋଟାଙ୍ଗୀ ବ୍ଲକର ସେରୁବନ୍ଦ ପାହାଡ଼ରେ ନାଲକୋ ପକ୍ଷରୁ ପ୍ରସ୍ତାବିତ ବକ୍ସାଇଟ୍ ଖନନକୁ ବିରୋଧ କରି ସେରୁବନ୍ଦ ସୁରକ୍ଷା ସମିତିର ଆହ୍ୱାନରେ ବ୍ୟାପକ ଜନଆନ୍ଦୋଳନ ଦେଖିବାକୁ ମିଳିଛି। ମାଳିପୁଟ, ଖୁଳି, ଶରଶୁପଦର, କୋଟିଆ, ନୂଆଗାଁ ଓ ପୋଟାଙ୍ଗୀ ସମେତ ୬ଟି ପଞ୍ଚାୟତର ହଜାରରୁ ଅଧିକ ଲୋକ ଏଥିରେ ସାମିଲ ହୋଇଥିଲେ। ଖୁଳି ଗ୍ରାମପଞ୍ଚାୟତରୁ ମାଳିପୁଟ ପର୍ଯ୍ୟନ୍ତ ଏକ ମୋଟରସାଇକେଲ୍ ରାଲି ଅନୁଷ୍ଠିତ ହୋଇଥିଲା। ରାଲି ପରେ ବିଭିନ୍ନ ଗ୍ରାମରେ ସଚେତନତା ସଭା ଆୟୋଜନ କରାଯାଇଥିଲା। ପରବର୍ତ୍ତୀ ସମୟରେ ପୋଟାଙ୍ଗୀ ତହସିଲଦାରଙ୍କ ଜରିଆରେ ରାଜ୍ୟପାଳ, ମୁଖ୍ୟମନ୍ତ୍ରୀ, କେନ୍ଦ୍ର ଖଣିମନ୍ତ୍ରୀ, ରାଜ୍ୟ ଖଣିମନ୍ତ୍ରୀ ଏବଂ କୋରାପୁଟ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଥିଲା। ଦାବିପତ୍ରରେ ଉଲ୍ଲେଖ କରାଯାଇଛି ଯେ, ଅଞ୍ଚଳବାସୀଙ୍କ ସହମତି ବିନା ଖଣି ଖନନ ପାଇଁ ଜମିର କିସମ ପରିବର୍ତ୍ତନ କରାଯାଇଛି। ସେରୁବନ୍ଦ ପାହାଡ଼ରେ ୧୦୪ଟି ଚିରସ୍ରୋତା ଝରଣା ରହିଥିବାରୁ ଖଣି ଖନନ ହେଲେ ଜଳସମ୍ପଦ, ଜଳବିଦ୍ୟୁତ ପ୍ରକଳ୍ପ ଓ କୃଷି କାର୍ଯ୍ୟ ଗୁରୁତର ଭାବେ ପ୍ରଭାବିତ ହେବ। ସେହିପରି ୬ଟି ପଞ୍ଚାୟତର ବାସିନ୍ଦା ବିସ୍ଥାପିତ ହେବାର ଆଶଙ୍କା ମଧ୍ୟ ରହିଛି। ସେରୁବନ୍ଦ ସୁରକ୍ଷା ସମିତି ପକ୍ଷରୁ ଗଣତାନ୍ତ୍ରିକ ଅଧିକାର ଓ ମାନବାଧିକାରର ସୁରକ୍ଷା ଦୃଷ୍ଟିରୁ ସେରୁବନ୍ଦ ପାହାଡ଼ରେ ବକ୍ସାଇଟ୍ ଖନନ ପ୍ରକ୍ରିୟାକୁ ତୁରନ୍ତ ସ୍ଥଗିତ ରଖିବା ସହ ରାଜ୍ୟପାଳଙ୍କ ହସ୍ତକ୍ଷେପ ଦାବି କରାଯାଇଛି। ଏହି କାର୍ଯ୍ୟକ୍ରମରେ ଖୁଳି ସରପଞ୍ଚ ଅଲେମେ ପୁଲ, ନୂଆଗାଁ ସରପଞ୍ଚ ସୁବାଷ ଖରା, ମାଳିପୁଟ ସରପଞ୍ଚ ସାମ୍ନାତ ଗୁଣ୍ଟା, ମାଳିପର୍ବ ସୁରକ୍ଷା ସମିତିର ସଭାପତି ବିଜୟ ଖୀଲ, ସମ୍ପାଦକ ନିରଞ୍ଜନ ଖୀଲ ଏବଂ ହାଲ ବିସ୍ଥାପିତ ସଂଘର ସଭାପତି ତ୍ରିଲୋଚନ ମୁଦୁଲି ପ୍ରମୁଖ ଉପସ୍ଥିତ ଥିଲେ।