ଜଗତପୁର ଗୋଲେଇ ଛକ ପାର୍ଶ୍ଵରେ କୁଢ଼ କୁଢ଼ ଅଳିଆ ଆବର୍ଜନା, ଡେଙ୍ଗୁ, ମ୍ୟାଲେରିଆ ଆଦି ରୋଗ ଭୟରେ ଅଞ୍ଚଳବାସୀ

ଜଗତପୁର: ଜଗତପୁର ଏକ ଡେଙ୍ଗୁ ପ୍ରବଣ ଅଂଚଳ l ଅତୀତରେ ଜଗତପୁର ଶିଳ୍ପାଞ୍ଚଳରୁ ଡେଙ୍ଗୁ ଲାର୍ଭା ଚିହ୍ନଟ ହେବା ସହ ଡେଙ୍ଗୁ ରୋଗୀ ମଧ୍ୟ ଚିହ୍ନଟ ହୋଇଥିଲା l ସେବେଠୁ ସିଏମସି ପକ୍ଷରୁ ପରିମଳ ବ୍ୟବସ୍ଥା ଉପରେ ଗୁରୁତ୍ୱ ଦିଆହୋଇ ଆସୁଛି l ମାତ୍ର ବର୍ତ୍ତମାନ ସିଏମସି କର୍ତୃପକ୍ଷଙ୍କ ଖାମଖିଆଲି ମନୋଭାବ ପାଇଁ ଏହି ଅଂଚଳରେ ପରିମଳ ବ୍ୟବସ୍ଥା ସମ୍ପୂର୍ଣ ବିପର୍ଯ୍ୟସ୍ତ ହୋଇପଡିଛି l ଜଗତପୁର ଗୋଲେଇଛକ ପାର୍ଶ୍ଵରେ ମାସ ମାସ ଧରି ପଡି ରହିଛି କୁଢ଼ କୁଢ଼ ଅଳିଆ ଆବର୍ଜନା । ବର୍ଷା ଋତୁ ଆରମ୍ଭ ହୋଇଯାଇଛି l ବର୍ଷା ହେବା ଦ୍ୱାରା ଏହି ଅଳିଆ ସବୁ ପଚିସଢି ଦୁର୍ଗନ୍ଧ ହେବା ସହ ପରିବେଶ ଦୂଷିତ ହେଉଛି l ଏଥିସହିତ ସେଥିରେ ମଶା, ମାଛି ଓ ବିଭିନ୍ନ ପ୍ରକାରର ପୋକ ସୃଷ୍ଟି ହେଉଛନ୍ତି | ଫଳରେ ସ୍ଥାନୀୟ ଅଧିବାସୀ ବିଭିନ୍ନ ରୋଗରେ ଆକ୍ରାନ୍ତ ହେବାର ଆଶଙ୍କା ସୃଷ୍ଟି ହୋଇଛି। ସିଏମସିର ଅବହେଳା ପାଇଁ ଲୋକେ ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି । କଟକ ମହାନଗର ନିଗମ ଅନ୍ତର୍ଗତ ଜଗତପୁର ୪୯ ନଂ ୱାର୍ଡରେ ସିଏମସି ପକ୍ଷରୁ ପରିସ୍କାର ପରିଛନ୍ନତା ପାଇଁ ଅଫିସର, ସୁପରଭାଇଜର, କୁଲି ଓ ଝାଡୁଦାର ମାନଙ୍କୁ ପ୍ରତ୍ୟେକ ଗଳି କନ୍ଦିରେ ନିୟୋଜିତ କରାଯାଉଛି । ମାତ୍ର କାର୍ଯ୍ୟ ତଦାରଖ ଦାୟିତ୍ୱରେ ଥିବା ଅଫିସରଙ୍କ ଦେଖା ମିଳୁନାହିଁ । ସାହି ବସ୍ତିର ଗଳିରେ ଡ୍ରେନ ସଫେଇ ହୋଇ ରାସ୍ତା ଉପରେ ଆବର୍ଜ୍ଜନା ମାଟି ଦୀର୍ଘ ଦିନ ଧରି ଗଦା ହୋଇ ପଡ଼ି ରହୁଛି। ଏଥି ସହ ସଫେଇ କର୍ମଚାରି ରାସ୍ତା ଉପରୁ ଝାଡ଼ୁ ମାରି ଆବର୍ଜ୍ଜନା ଗୁଡ଼ିକ ରାସ୍ତା କଡରେ ଠୁଳ କରି ଗଦା କରିବା ଦ୍ଵାରା ବୁଲା ଗାଈଗୋରୁ ଓ କୁକୁର ସେହି ଅଳିଆ ଆବର୍ଜ୍ଜନାକୁ ଏଣେ ତେଣେ ଖେଳେଇ ଦେବା ଦ୍ୱାରା ରାସ୍ତାରେ ଯାତାୟାତ ବେଳେ ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସିଏମସିର ଏଭଳି ଖାମଖିଆଲି ମନୋଭାବ ପାଇଁ ଏହି ଅଂଚଳରେ ନିକଟ ଭବିଷ୍ୟତରେ ଡେଙ୍ଗୁ ହଇଜା ଭଳି ପରିସ୍ଥିତି ସୃଷ୍ଟି ହୋଇ ପାରେ ବୋଲି ଆଶଙ୍କା କରି ବୁଦ୍ଧିଜୀବୀମାନେ ସିଏମସିର ଏଭଳି କାର୍ଯ୍ୟକୁ ଦୃଢ ନିନ୍ଦା କରିଛନ୍ତି । ତୁରନ୍ତ ଏସବୁ ପ୍ରତି ନିଗମ ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି।