ନିଜ ଜାଗାରେ ମାଟି ପକାକୁ ବିରୋଧ କରିବାରୁ ମହିଳାଙ୍କୁ ମରଣାନ୍ତକ ଆକ୍ରମଣ, ଗୁରୁତର ମହିଳା ମେଡିକାଲରେ ଭର୍ତ୍ତି, ଥାନାରେ ଅଭିଯୋଗ

ସାଲେପୁର:ନିଜ ଜାଗାରେ ମାଟି ପକାକୁ ବିରୋଧ କରିବାରୁ ସଂଘବଦ୍ଧ ଭାବେ ଜନୈକ ମହିଳାଙ୍କୁ ମରଣାନ୍ତକ ଆକ୍ରମଣ କରାଯାଇଥିବା ଅଭିଯୋଗ ହୋଇଛି | ଫଳରେ ମହିଳା ଗୁରୁତର ଆହତ ହୋଇ ମେଡିକାଲରେ ଚିକିତ୍ସିତ ହେଉଛନ୍ତି | ପ୍ରକାଶ ଯେ, ସାଲେପୁର ବ୍ଲକ କଟରପା ପଞ୍ଚାୟତ ଅନ୍ତର୍ଗତ ମହନା ପୁର ଗାଁ ର ସ୍ୱର୍ଣ୍ଣଲତା ବେହେରାଙ୍କ ଜାଗା ଉପରେ କିଛି ବ୍ୟକ୍ତି ଜୋର ଜବରଦସ୍ତ ମାଟି ପକାଇ ରାସ୍ତା ନିର୍ମାଣ କରୁଥିବା ବେଳେ ସ୍ୱର୍ଣ୍ଣଲତା ଏହାକୁ ବିରୋଧ କରିଥିଲେ | ଏଥିରେ ଉତକ୍ଷିପ୍ତ ହୋଇ ସଂପୃକ୍ତ ବ୍ୟକ୍ତି କିଛି ଯୁବକ ଓ ମହିଳାମାନେ ସଂଘ ବଦ୍ଧ ଭାବେ ସ୍ୱର୍ଣାଲତା ଙ୍କୁ ବିଭିନ୍ନ ମାରଣାସ୍ତ୍ର ରେ ଆକ୍ରମଣ କରିଥିଲେ | ଏଥିରେ ତାଙ୍କ ମୁଣ୍ଡ, ବେକ ଓ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିବା ସହ ରକ୍ତାକ୍ତ ହୋଇ ଗୁରୁତର ହୋଇଥିଲେ | ତାଙ୍କୁ ସଙ୍ଗେ ସଙ୍ଗେ ସାଲେପୁର ମେଡିକାଲ ନିଆଯାଇଥିଲା | ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡମେଡିକାଲକୁ ସ୍ଥାନାନ୍ତର କରାଯାଇଛି | ଏନେଇ ତାଙ୍କ ଭଉଣୀ ପ୍ରେମଲତା ବେହେରା ସାଲେପୁର ଥାନାରେ ଲିଖିତ ଅଭିଯୋଗ କରିଛନ୍ତି । ପରିବାର ପ୍ରତି ବିପଦ ଥିବା ବେଳେ ପରିବାରଙ୍କୁ ସୁରକ୍ଷା ଯୋଗାଇ ଦେବା ସହ ଦୋଷୀ ମାନଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବୀ କରିଛନ୍ତି |