ପୋଖରୀ ଖନନ ଯୋଗୁଁ ରାସ୍ତା ବନ୍ଦ, ଚିନ୍ତାରେ ଚାଷୀ ଓ ଛେଳି ଫାର୍ମ ମାଲିକ

ଅନୁଗୋଳ: ବଅଁରପାଳ ବ୍ଲକ ଅନ୍ତର୍ଗତ ବନ୍ଦା ଅଞ୍ଚଳର ଆଲୁମିନିୟମ୍ ପାର୍କ ନିକଟରେ ପୋଖରୀ ଖନନ କାର୍ଯ୍ୟ ଯୋଗୁଁ ଏକ ଗୁରୁତ୍ୱପୂର୍ଣ୍ଣ ଗ୍ରାମ୍ୟ ରାସ୍ତା ସମ୍ପୂର୍ଣ୍ଣ ବନ୍ଦ ହୋଇଯାଇଥିବାରୁ ସ୍ଥାନୀୟ ଲୋକେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ବିଶେଷକରି ନିକଟରେ ଥିବା ଏକ ଛେଳି ଫାର୍ମକୁ ଯାତାୟାତ ପାଇଁ ଏହି ରାସ୍ତା ଏକମାତ୍ର ସଂଯୋଗ ହୋଇଥିବାରୁ ଫାର୍ମକୁ ଯିବା ଆସିବାରେ ବ୍ୟାପକ ଅସୁବିଧା ସୃଷ୍ଟି ହୋଇଛି। ରାସ୍ତା ବନ୍ଦ ହେବା ଫଳରେ ଫାର୍ମର ଦୈନନ୍ଦିନ ପରିଚାଳନା, ପଶୁଖାଦ୍ୟ ପରିବହନ ଏବଂ ଅନ୍ୟାନ୍ୟ କୃଷି ସମ୍ପର୍କିତ କାର୍ଯ୍ୟ ବାଧାପ୍ରାପ୍ତ ହେଉଥିବା ଅଭିଯୋଗ ହୋଇଛି। ଏହି ସମସ୍ୟାର ତୁରନ୍ତ ସମାଧାନ କରି ଯାତାୟାତ ସୁବିଧା ପୁନଃସ୍ଥାପନ କରିବା ପାଇଁ ବନ୍ଦା ଗ୍ରାମର ଚନ୍ଦ୍ରଶେଖର ସାହୁ ଜିଲ୍ଲାପାଳଙ୍କ ନିକଟରେ ଲିଖିତ ଭାବେ ଆପତ୍ତି ଜଣାଇଛନ୍ତି।