ଜଣେ ମେଧାବୀଙ୍କ ବିଦାୟ, ଅସଂଖ୍ୟ ସ୍ମୃତି ଛାଡ଼ି ଆରପାରିକୁ ଚାଲିଗଲେ ଜଗନ୍ନାଥ

ଜଣେ ମେଧାବୀଙ୍କ ବିଦାୟ, ଅସଂଖ୍ୟ ସ୍ମୃତି ଛାଡ଼ି ଆରପାରିକୁ ଚାଲିଗଲେ ଜଗନ୍ନାଥ ସିନାପାଲି: ୨୧/୦୬ ରିପୋର୍ଟର: ମଳୟ ମେହେର ସିଙ୍ଗଝର ଅଞ୍ଚଳର ଶିକ୍ଷା, ମେଧା ଓ କର୍ମନିଷ୍ଠାର ପ୍ରତୀକ ଭାବେ ପରିଚିତ ସ୍ୱର୍ଗତ ଜଗନ୍ନାଥ ନାଏକଙ୍କ ଅକାଳ ବିୟୋଗ ଖବର ସମଗ୍ର ଅଞ୍ଚଳକୁ ଶୋକାକୁଳ କରିଦେଇଛି । ଗୋଡାଲ ଗ୍ରାମର ସୁଯୋଗ୍ୟ ସନ୍ତାନ ତଥା ସିଙ୍ଗଝର ଉଚ୍ଚ ବିଦ୍ୟାଳୟର ୧୯୯୧ ବ୍ୟାଚ୍‌ର କୃତୀ ଟପ୍ପର ଛାତ୍ର ଜଗନ୍ନାଥ ନାଏକ ନିଜର ମେଧା, ଅଧ୍ୟବସାୟ ଓ ସରଳ ଜୀବନଶୈଳୀ ପାଇଁ ସମସ୍ତଙ୍କ ନିକଟରେ ଆଦର ଓ ସମ୍ମାନର ପାତ୍ର ଥିଲେ । ଛାତ୍ରଜୀବନରୁ ହିଁ ସେ ନିଜର ଅସାଧାରଣ ପ୍ରତିଭାର ପରିଚୟ ଦେଇଥିଲେ । ସିଙ୍ଗଝର ଉଚ୍ଚ ବିଦ୍ୟାଳୟରେ ଅଧ୍ୟୟନ କରୁଥିବା ସମୟରେ ୧୯୯୧ ବ୍ୟାଚ୍‌ର ଶ୍ରେଷ୍ଠ ଛାତ୍ର ଭାବେ ସେ ପରିଚିତ ହୋଇଥିଲେ । ପରବର୍ତ୍ତୀ ସମୟରେ ଭୁବନେଶ୍ୱରସ୍ଥ ଆଞ୍ଚଳିକ ଶିକ୍ଷା ପ୍ରତିଷ୍ଠାନ (ଆର୍‌ଆଇଇ)ରେ କାର୍ଯ୍ୟରତ ରହି ଶିକ୍ଷା କ୍ଷେତ୍ରରେ ନିଜର ନିଷ୍ଠା, ସତତା ଓ ଦାୟିତ୍ୱବୋଧର ଅନନ୍ୟ ଦୃଷ୍ଟାନ୍ତ ସୃଷ୍ଟି କରିଥିଲେ । ସହକର୍ମୀ, ବନ୍ଧୁ ଏବଂ ପୂର୍ବତନ ଛାତ୍ରଛାତ୍ରୀମାନଙ୍କ ମତରେ, ଜଗନ୍ନାଥ ନାଏକ କେବଳ ଜଣେ ମେଧାବୀ ବ୍ୟକ୍ତି ନୁହେଁ, ବରଂ ଜଣେ ବିନମ୍ର, ସହୃଦୟ ଓ ସମାଜପ୍ରତି ସମର୍ପିତ ମଣିଷ ଥିଲେ । ତାଙ୍କର ଅକାଳ ବିୟୋଗ ସିଙ୍ଗଝର ଉଚ୍ଚ ବିଦ୍ୟାଳୟ ପରିବାର, ଶିକ୍ଷା ଜଗତ ଓ ସମଗ୍ର ଅଞ୍ଚଳ ପାଇଁ ଏକ ଅପୂରଣୀୟ କ୍ଷତି ବୋଲି ବିଭିନ୍ନ ମହଳରୁ ମତ ପ୍ରକାଶ ପାଇଛି । ତାଙ୍କ ବିୟୋଗରେ ଗୋଡାଲ ଗ୍ରାମ ସମେତ ସମଗ୍ର ସିଙ୍ଗଝର ଅଞ୍ଚଳରେ ଗଭୀର ଶୋକର ଛାୟା ଖେଳିଯାଇଛି । ବହୁ ବିଶିଷ୍ଟ ବ୍ୟକ୍ତି, ପୂର୍ବତନ ଛାତ୍ର ଓ ସାମାଜିକ କର୍ମୀମାନେ ତାଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇବା ସହ ଶୋକସନ୍ତପ୍ତ ପରିବାର ପ୍ରତି ସମବେଦନା ପ୍ରକାଶ କରିଛନ୍ତି । ସ୍ୱର୍ଗତ ନାଏକଙ୍କ ଜୀବନ ସଂଘର୍ଷ, ପରିଶ୍ରମ ଓ ସଫଳତାର କାହାଣୀ ଆଗାମୀ ପିଢ଼ି ପାଇଁ ପ୍ରେରଣାର ଉତ୍ସ ହୋଇ ରହିବ ବୋଲି ସମସ୍ତେ ମତ ପ୍ରକାଶ କରିଛନ୍ତି । ପ୍ରଭୁ ଜଗନ୍ନାଥଙ୍କ ନିକଟରେ ତାଙ୍କ ଅମର ଆତ୍ମାର ସଦ୍‌ଗତି କାମନା କରାଯାଇଛି ।