ବିପର୍ଯ୍ୟୟ ପରିଚାଳନା ନିମନ୍ତେ ପ୍ରସ୍ତୁତି ବୈଠକ

ଢ଼େଙ୍କାନାଳ: ସାମ୍ଭାବ୍ୟ ବର୍ଷା ଓ ବାତ୍ୟାକୁ ଦୃଷ୍ଟିରେ ରଖି ଏହାର ସୁପରିଚାଳନା ନିମନ୍ତେ ଆଜି ପୂର୍ବାହ୍ନରେ ପୁରୁଣା ଜିଲ୍ଲା ପରିଷଦ ସମ୍ମିଳନୀ ହଲ୍ ଠାରେ ଜିଲ୍ଲା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ, ଢ଼େଙ୍କନାଳ ଦ୍ୱାରା ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ବୈଠକରେ ରାଜ୍ୟ ପର୍ଯ୍ୟବେକ୍ଷକ ପ୍ରାଚୀ ପ୍ରତ୍ୟୁସ୍ତା ରାଉତ ଯୋଗଦେଇ ଜିଲ୍ଲାରେ ବନ୍ୟା ବାତ୍ୟା ଭଳି ପରିସ୍ଥିତିର ମୁକାବିଲା ପାଇଁ ବିଭିନ୍ନ ବିଭାଗ ପକ୍ଷରୁ ପ୍ରସ୍ତୁତି କାର୍ଯ୍ୟକ୍ରମ ସଂପର୍କରେ ଅବଗତ ହୋଇଥିଲେ । ପ୍ରସ୍ତୁତି ସଂପର୍କରେ ଅବଗତ ହୋଇ , ସମସ୍ତ ବିଭାଗୀୟ ଅଧିକାରୀ ଓ କର୍ମଚାରୀମାନେ ସମନ୍ବୟ ରକ୍ଷା କରି ସର୍ବଦା ସତର୍କ ଓ ପ୍ରସ୍ତୁତ ରହି ତତ୍କାଳ ଆବଶ୍ୟକ ସହାୟତା ଯୋଗାଇ ଦେବାକୁ ପରାମର୍ଶ ଦେଇଥିଲେ । ଏହି ବୈଠକରେ ସ୍ୱାସ୍ଥ୍ୟ ବିଭାଗ ପକ୍ଷରୁ ବନ୍ୟା ଆଶଙ୍କା ଥିବା ଅଂଚଳ ଓ ବହୁମୂଖୀ ଆଶ୍ରୟସ୍ଥଳରେ ଅତ୍ୟାବଶ୍ୟକ ଔଷଧ, ସାପ କାମୁଡ଼ା ଇଞ୍ଜେକ୍ସନ, ମୋବାଇଲ ସ୍ୱାସ୍ଥ୍ୟ ସେବା ସୁବିଧା ଓ ମେଡ଼ିକାଲ ରିଲିଫ୍ ସେଣ୍ଟରର କାର୍ଯ୍ୟକାରିତା, ଶିଶୁ, ଗର୍ଭବତୀ ମହିଳା, ବୃଦ୍ଧବୃଦ୍ଧା ଓ ଶାରିରୀକ ବିକଳାଙ୍ଗଙ୍କ ପାଇଁ ଆବଶ୍ୟକ ସେବା, ଆବଶ୍ୟକ ସ୍ଥଳେ ଲୋକଙ୍କୁ ସ୍ଥାନାନ୍ତର କରାଇବା, ସେମାନଙ୍କ ପାଇଁ ଖାଦ୍ୟ ଓ ପାନୀୟ ଜଳ ଯୋଗାଣ ବ୍ୟବସ୍ଥା, ନିୟମିତ ପାନୀୟ ଜଳ ଯୋଗାଣ, ଆବଶ୍ୟକ ସ୍ଥଳେ ଟ୍ୟାଙ୍କର ଓ ସିନ୍ଟେକ୍ସ ଦ୍ୱାରା ପାଣି ଯୋଗାଣ, ଲୋକଙ୍କୁ ଆବଶ୍ୟକ ପଲିଥିନ ଯୋଗାଣ, ସ୍ଥାନୀୟ ସ୍ବେଚ୍ଛା ସେବୀଙ୍କ ଦ୍ୱାରା ଲୋକଙ୍କୁ ସଚ଼େତନ କରିବା ଓ ଉଦ୍ଧାର କାର୍ଯ୍ୟରେ ସହଯୋଗ କରିବା, ଅଗ୍ନିଶମ ଏବଂ ଓଡ୍ରାଫ ଦ୍ୱାରା ରାସ୍ତା ଅବରୋଧକୁ ହଟାଇବା , ତଳ ସ୍ତର ପର୍ଯ୍ୟନ୍ତ ବର୍ଷା, ବାତ୍ୟାର ପୂର୍ବ ସୂଚ଼ନା ପହଞ୍ଚାଇ ସମସ୍ତଙ୍କୁ ସତର୍କ ରହିବାକୁ ପରାମର୍ଶ ଦେବା, ଶୁଖିଲାଖାଦ୍ୟ, ପେଟ୍ରୋଲିୟମ ପଦାର୍ଥ ମହଜୁଦ୍ ରଖାଯିବା, ଗୃହ ପାଳିତ ପଶୁ ପକ୍ଷୀଙ୍କ ପାଇଁ ଔଷଧାଦିର ବ୍ୟବସ୍ଥା, ବିଦ୍ୟୁତ୍ ସରବରାହକୁ ଯଥା ଶୀଘ୍ର ନିୟମିତ କରିବା, ପୋଲିସ ପ୍ରଶାସନର ଭୂମିକା ଆଦି ପ୍ରସ୍ତୁତି ସଂପର୍କରେ ଆଲୋଚନା କରାଯାଇଥିଲା । ସଂପୃକ୍ତ ବିଭାଗ ସମନ୍ୱୟ ରକ୍ଷା କରି ପ୍ରସ୍ତୁତ ରହିବା ଦ୍ୱାରା ଆମର ଧନ ଜୀବନ କ୍ଷତିକୁ ରୋକା ଯାଇ ପାରିବ ବୋଲି ଆପାତକାଳୀନ ଅଧିକାରୀ ଶ୍ରୀ ସୁଦୀପ୍ତ କୁମାର ସାହୁ ପ୍ରକାଶ କରିଛନ୍ତି । ଆସନ୍ତା କାଲି ୧୯ ତାରିଖରେ ବିଭିନ୍ନ ବହୁମୂଖୀ ଆଶ୍ରୟ ସ୍ଥଳରେ ଉଦ୍ଧାର କାର୍ଯ୍ୟର ପ୍ରସ୍ତୁତିର ମକ୍ ଡ୍ରିଲ ଆୟୋଜନ ହେବ ବୋଲି ସେ ସୂଚ଼ନା ଦେଇଛନ୍ତି । ଏହି ବୈଠକରେ ଡ଼େପୁଟୀ କଲେକ୍ଟର ପ୍ରିସିୟସ୍ ପ୍ରଧାନ, ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷର ଡ଼ି.ପି.ଓ. ଶ୍ରୀ ସଚ୍ଚିଦାନନ୍ଦ ପତି ବିଭାଗୀୟ ଅଧିକାରୀ ମାନେ ଉପସ୍ଥିତ ରହି ପ୍ରସ୍ତୁତି ସଂପର୍କରେ ଆଲୋଚନା କରିଥିଲେ ।