ନାଲକୋର ବର୍ଜ୍ୟ ଜଳ ନିଷ୍କାସନ ନେଇ ପୁଣି ଉଠିଲା ପ୍ରଶ୍ନ, ନମୁନା ପରୀକ୍ଷା ରିପୋର୍ଟ ସାର୍ବଜନୀନ କରିବାକୁ ଦାବି

ଅନୁଗୋଳ: ଅନୁଗୋଳ ଜିଲ୍ଲାର କୁଲାଡ଼, ଗିରାଙ୍ଗ, ତୁଳସୀପାଳ, ଗାଢ଼ରଖାଇ ଏବଂ ବଡତଇଳା ଅଞ୍ଚଳର ବାସିନ୍ଦାମାନେ ଦୀର୍ଘଦିନ ଧରି ନାଲକୋରୁ ନିଷ୍କାସିତ ବର୍ଜ୍ୟ ଜଳ ଯୋଗୁଁ ପରିବେଶ, ଚାଷ ଜମି ଏବଂ ପାନୀୟ ଜଳ ଉତ୍ସ କ୍ଷତିଗ୍ରସ୍ତ ହେଉଥିବା ଅଭିଯୋଗ କରିଆସୁଛନ୍ତି।ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଦୂଷିତ ପାଣି ଯୋଗୁଁ ମଣିଷଙ୍କ ମଧ୍ୟରେ କିଡନୀ, ହାଡ଼ ଓ ଫୁସଫୁସ ଜନିତ ବିଭିନ୍ନ ରୋଗ ବୃଦ୍ଧି ପାଉଥିବା ବେଳେ ଗାଈ, ଗୋରୁ ଓ ଅନ୍ୟାନ୍ୟ ପଶୁପକ୍ଷୀ ମଧ୍ୟ ଅଜଣା ରୋଗରେ ପୀଡ଼ିତ ହେଉଥିବା ଅଭିଯୋଗ ରହିଛି। ନାଲକୋର ETP (Effluent Treatment Plant) ଥିବା ସତ୍ତ୍ୱେ ମଧ୍ୟ ପ୍ରାୟ ୪୫ ବର୍ଷ ଧରି ଏହି ସମସ୍ୟାର ସ୍ଥାୟୀ ସମାଧାନ ହୋଇନଥିବା ଅଭିଯୋଗ ହେଉଛି।ଏହି ପ୍ରସଙ୍ଗରେ କୁଲାଡ଼ ଗ୍ରାମର ସମାଜସେବୀ ଅଭୟ ସିଂ ଓ ପ୍ରଶାନ୍ତ ପାତ୍ର ଏବଂ ଗିରାଙ୍ଗ ଗ୍ରାମର ସୁଜିତ୍ ଗଡନାୟକ ଅଭିଯୋଗ ଦାଖଲ କରିଥିଲେ। ଅଭିଯୋଗ ପରେ Odisha State Pollution Control Board ଏବଂ ନାଲକୋ କର୍ତ୍ତୃପକ୍ଷ ଓ ଗ୍ରାମବାସୀଙ୍କ ଉପସ୍ଥିତିରେ କୁଲାଡ଼, ଗିରାଙ୍ଗ, ତୁଳସୀପାଳ, ଗାଢ଼ରଖାଇ ସମେତ ବିଭିନ୍ନ ସ୍ଥାନରୁ ପାଣିର ନମୁନା ସଂଗ୍ରହ କରିଥିଲେ।ତେବେ ନମୁନା ସଂଗ୍ରହ ପରେ ପରୀକ୍ଷା ରିପୋର୍ଟ ସାର୍ବଜନୀନ କରିବାକୁ ଆସିଥିବା କର୍ତ୍ତ୍ଵ ପକ୍ଷ କହିଛନ୍ତି।ଅଭିଯୋଗକାରୀମାନେ ରିପୋର୍ଟକୁ ତୁରନ୍ତ ସାର୍ବଜନୀନ କରିବା, ନିରପେକ୍ଷ ତଦନ୍ତ କରିବା ଏବଂ ପ୍ରଭାବିତ ଅଞ୍ଚଳବାସୀଙ୍କ ସ୍ୱାସ୍ଥ୍ୟ, ପରିବେଶ ଓ ଜୀବିକାର ସୁରକ୍ଷା ପାଇଁ ଆବଶ୍ୟକ ପଦକ୍ଷେପ ନେବାକୁ ଦାବି କରିଛନ୍ତି।ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ପୁଣିଥରେ ପରିବେଶ ସୁରକ୍ଷା ଓ ଶିଳ୍ପ ପ୍ରଦୂଷଣ ନିୟନ୍ତ୍ରଣ ପ୍ରସଙ୍ଗ ଚର୍ଚ୍ଚାରେ ରହିଛି।