ଜବରଦଖଲ ଉଚ୍ଛେଦରେ ପୁଣି ପ୍ରଶ୍ନବାଚୀ : ବିବାଦୀୟ ଗଣ୍ଡାବାହାଳୀ ପରେ ଅନ୍ୟ ଗ୍ରାମ ପାଇଁ ନିରବ ପ୍ରଶାସନ

ନୂଆପଡା, ସିନାପାଲି: ନୂଆପଡା ଉପଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସିନାପାଲି ବ୍ଲକ ଅନ୍ତର୍ଗତ ଗଣ୍ଡାବାହାଳୀ ମୌଜାରେ ସରକାରୀ ଜମି ଉପରେ ହୋଇଥିବା ବିବାଦୀୟ ଜବରଦଖଲ ଉଚ୍ଛେଦ କାର୍ଯ୍ୟ ପ୍ରଶାସନ ପକ୍ଷରୁ ହୋଇଥିଲେ ମଧ୍ୟ, ସମାନ ଅବସ୍ଥାରେ ଥିବା ଅନ୍ୟାନ୍ୟ ଗ୍ରାମ ଯଥା ଡୁଆଝର, ବରଗାଁ ରେ ଏହାର କୌଣସି ପ୍ରଭାବ ଦେଖାଯାଇନାହିଁ । ଏହାକୁ କେନ୍ଦ୍ର କରି ସାଧାରଣ ଲୋକଙ୍କ ମଧ୍ୟରେ ପ୍ରଶାସନର କାର୍ଯ୍ୟପ୍ରଣାଳୀ ଉପରେ ପ୍ରଶ୍ନଚିହ୍ନ ଉଠିଛି । ସିନାପାଲି–ଖଡ଼ିଆଳ ମୁଖ୍ୟ ରାସ୍ତା ସହ ଜଡିତ ଡୁଆଝର ଓ ବରଗାଁ ପରି ଗ୍ରାମଗୁଡିକରେ ଏପର୍ଯ୍ୟନ୍ତ ଜବରଦଖଲ ଉଚ୍ଛେଦ କାର୍ଯ୍ୟ ଆରମ୍ଭ ହୋଇନଥିବାରୁ “ପ୍ରଶାସନ କାହାର ଚାପରେ କାମ କରୁଛି କି?” ବୋଲି ସାଧାରଣରେ ଚର୍ଚ୍ଚା ଜୋରଦାର ହୋଇଛି । ଓଡିଶା ପ୍ରିଭେନ୍ସନ ଅଫ୍ ଲ୍ୟାଣ୍ଡ ଏନକ୍ରୋଚ୍ମେଣ୍ଟ ଆକ୍ଟ–୧୯୭୨ ଅନୁସାରେ ଜବରଦଖଲକାରୀଙ୍କୁ ପ୍ରଥମେ ନୋଟିସ ଜାରି କରି, ନିର୍ଦ୍ଧାରିତ ସମୟ ସୀମା ପରେ ଉଚ୍ଛେଦ କରିବା ନିୟମ ରହିଛି । କିନ୍ତୁ ଏହି ନିୟମ ପ୍ରୟୋଗରେ ଅସମତା ଥିବା ନେଇ ଗ୍ରାମବାସୀଙ୍କ ଅଭିଯୋଗ ଗୁରୁତ୍ୱ ନେଇଛି । ଗଣ୍ଡାବାହାଳୀରେ ହୋଇଥିବା ଉଚ୍ଛେଦ କାର୍ଯ୍ୟକୁ ନେଇ ଗ୍ରାମବାସୀମାନେ କିଛିଦିନ ପୂର୍ବରୁ ସାମ୍ବାଦିକ ସମ୍ମିଳନୀ କରି ଗୁରୁତର ଅଭିଯୋଗ ଉଠାଇଥିଲେ । ସେମାନଙ୍କ କହିବା ଅନୁଯାୟୀ, ପ୍ରଶାସନ ବଡ଼ ବଡ଼ ପ୍ରଭାବଶାଳୀ ଲୋକଙ୍କ ଘରକୁ ଛାଡି ଛୋଟ ଲୋକଙ୍କ ଘରକୁ ଟାର୍ଗେଟ କରି ଭାଙ୍ଗିଛି । ସିନାପାଲି ମୁଖ୍ୟ ରାସ୍ତା ପ୍ରଶସ୍ତିକରଣ ଓ ଡ୍ରେନ ନିର୍ମାଣ ପାଇଁ ଜବରଦଖଲ ଉଚ୍ଛେଦ ଅତ୍ୟାବଶ୍ୟକ ହୋଇଥିବା ବେଳେ, ଗଣ୍ଡାବାହାଳୀରେ ଏହା ବିବାଦୀୟ ରୂପ ନେଇଥିଲା । ଗ୍ରାମବାସୀମାନେ ପୂର୍ବରୁ ବାରମ୍ବାର ବ୍ଲକ ଓ ଜିଲ୍ଲା ପ୍ରଶାସନଙ୍କ ନିକଟରେ ଏହି ନେଇ ଅଭିଯୋଗ କରିଥିଲେ । ମାର୍ଚ୍ଚ ୫ ତାରିଖରେ ରାସ୍ତା ରୋକ ଆନ୍ଦୋଳନ କରିବାକୁ ଚେତାବନୀ ଦେବା ପରେ ପ୍ରଶାସନ ଚେତିଥିଲା । ପରେ ଏକ ପ୍ରଶାସନିକ ଟିମ ଗଣ୍ଡାବାହାଳୀରେ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା କରି ଶୀଘ୍ର ଉଚ୍ଛେଦ କାର୍ଯ୍ୟ ଆରମ୍ଭ କରିବାକୁ ଆଶ୍ୱାସନ ଦେଇଥିଲା । ଏହା ପରେ ଜେସିବି ସହାୟତାରେ କିଛି ଅଂଶରେ ଉଚ୍ଛେଦ କାର୍ଯ୍ୟ ହୋଇଥିଲା ଓ ସେତେବେଳେ ବ୍ଲକ, ଜିଲ୍ଲା ଓ ପୋଲିସ ପ୍ରଶାସନ ଉପସ୍ଥିତ ଥିଲେ । ତଥାପି, ସେହି ଉଚ୍ଛେଦ ପ୍ରକ୍ରିୟାକୁ ନେଇ ପକ୍ଷପାତ ଅଭିଯୋଗ ଶାନ୍ତ ହୋଇନାହିଁ । ବର୍ତ୍ତମାନ ପ୍ରଶ୍ନ ଉଠୁଛି ଯେ ଗଣ୍ଡାବାହାଳୀର ବିବାଦ କେବେ ସମାଧାନ ହେବ ଓ ଡୁଆଝର, ବରଗାଁ ପରି ଅନ୍ୟ ଗ୍ରାମରେ ଜବରଦଖଲ ଉଚ୍ଛେଦ କାର୍ଯ୍ୟ କେବେ ଆରମ୍ଭ ହେବ ? ସମୟ ଦେଖାଇବ, ପ୍ରଶାସନ ନିଷ୍ପକ୍ଷ ଭାବେ କାର୍ଯ୍ୟ କରି ସମସ୍ତଙ୍କୁ ସମାନ ନ୍ୟାୟ ଦେବ କି, ନା ଏହି ବିବାଦ ଆଉ ଗଭୀର ରୂପ ନେବ ।