ଡ୍ରାଇଭର ସୁରକ୍ଷା କମିଟିର ଘୋଷଣା, ସପ୍ତାହକୁ ଥରେ ରୋଗୀଙ୍କୁ ମିଳିବ ମାଗଣା ଅଟୋ ସେବା

ନବରଙ୍ଗପୁର: ସପ୍ତାହକୁ ଥରେ ପ୍ରତି ସୋମବାର ଦିନ ଦୂର ଦୂରାନ୍ତ ରୋଗୀଙ୍କୁ ବସଷ୍ଟାଣ୍ଡରୁ ଡାକ୍ତରଖାନାକୁ ମାଗଣା ଅଟୋ ସେବା ମିଳିବ। ଏହା କୌଣସି ସରକାରୀ ଯୋଜନା ନୁହେଁ । ଅଟୋ ଡ୍ରାଇଭର ସୁରକ୍ଷା କମିଟି ପକ୍ଷରୁ ଏଭଳି ଅଭିନବ ପ୍ରୟାସ କରାଯାଇଛି। ଗୋଟିଏ କି ଦୁଇଟି ଗାଡି ନୁହେ ପ୍ରତି ସୋମବାର ବସଷ୍ଟାଣ୍ଟ ରୁ ମେଡିକାଲକୁ ଗଡ଼ିବ ୭୦ ଟି ଅଟୋ ଗାଡି l କମିଟି ପକ୍ଷରୁ ୭୦ ଜଣ ଅଟୋ ଚାଳକ ରୋଗୀଙ୍କୁ ସେବା ଯୋଗାଇବା ପାଇଁ ଘୋଷଣା କରିଛନ୍ତି। ସେମାନେ ନିଜର ପେଟପାଟଣାରୁ କାଟି ସପ୍ତାହକୁ ଥରେ ମାଗଣା ସେବା ଯୋଗାଇବେ। ଡ୍ରାଇଭର ସୁରକ୍ଷା କମିଟିର ଏଭଳି ମହତ କାର୍ଯ୍ୟକୁ ସାଧାରଣରେ ବେଶ ପ୍ରଶଂସା କରାଯାଇଛି l ଆଜି ଏହି କାର୍ଯ୍ୟକ୍ରମର ଶୁଭାରମ୍ଭ ଅବସରରେ ମୁଖ୍ୟଅତିଥି ଭାବେ ଅତିରିକ୍ତ ଜିଲ୍ଲାପାଳ ତପନ କୁମାର ଖୁଣ୍ଟିଆ, ସମ୍ମାନିତ ଅତିଥି ଏଡିପିଏଚଓ ଡା.ମଳୟ ତ୍ରିପାଠୀ, ମାତୃ ଆଶ୍ରୟ ଆଶ୍ରମ ଅଧ୍ଯକ୍ଷା କାଦମ୍ବିନୀ ତ୍ରିପାଠୀ, ମୁନ୍ନା ତ୍ରୀପାଠୀ, ଅବଦୁଲ ଫିରୋଜ ପ୍ରମୁଖ ଯୋଗ ଦେଇଥିଲେ। ଆଜି ପ୍ରଥମ ଦିନ ସନ୍ଧ୍ୟା ସୁଦ୍ଧା ୬ଜଣ ରୋଗୀ ଓ ସମ୍ପର୍କୀୟଙ୍କୁ ସହରରୁ ପ୍ରାୟ ୪ କିମି ଦୂର ମେଡିକାଲକୁ ମାଗଣାରେ ଅଟୋ ସେବା ଯୋଗାଇ ଦିଆଯାଇଥିଲା। ଏହି ଅବସରରେ ଅଟୋ ଡ୍ରାଇଭର ସୁରକ୍ଷା କମିଟି ସଭାପତି ବାର୍ଥ ହରିଜନ କହିଛନ୍ତି ଯେ ପ୍ରତି ସପ୍ତାହକୁ ଥରେ ଜଣେ ଅଟୋ ଚାଳକଙ୍କୁ ନିଜ ହାତରୁ ୭୦୦ ଟଙ୍କା ଗରିବ ରୋଗୀଙ୍କ ସେବା ପାଇଁ ଖର୍ଚ୍ଚ କରିବାକୁ ନିଷ୍ପତି ହୋଇଛି।